DILI, STLTIMORLESTE.com – Loron 3 fulan Novembru hanesan loron feto, nee importante hodi fo omenajen no onra ba eroina sira nia luta.
Iha biban nee, Sekretariu Estadu ba Igualdade (SEI), Elvina Sousa Carvalho liu husi diskursu iha Salaun Rede Feto Tersa (05/11/2024) hatoo parabens ba feto hotu neebe mak selebra loron feto neebe monu iha loron 3 fulan Novembru hanesan loron Nasional ba feto.
“Fo parabens ba feto maluk sira, loron 3 fulan Novembru loron nasional, loron neebe mak importante ba feto sira, loron neebe desidi atu komemora hodi bele fo omanajen ba eroina sira nia korajen hodi luta ba ukun rasik aan,” katak SEI.
Sekretaria Estadu hatete, maibe koalia kona-ba esensial hodi selebra loron ida nee tenke haree oin, katak selebra loron feto nee hodi fo onra ba feto Lutadora sira.
“Ita halo komemorasaun hodi fo onra ba feto Lutadora sira nia moris no lutadora sira iha familia no lutadora sira iha sosiedade nia laran, luta sira husi kotuk inspira ita atu feto sira agora luta tuir hakat ba oin,” katak nia.
Nia hatete, husi SEI apresia no hatete mos katak, esforsu sira neebe mak agora hamutuk ho SEI iha misaun ida importante atu hakbiit feto iha ekonomia nee papel importante husi SEI nia.
SEI nuudar nain ba advokasia ba promosaun igualdade no inkluzaun hodi fo empodera feto iha plataforma ida neebe prinsipal tebes mak kona-ba deklarasaun Maubesi kontribui ba empodera feto liu-liu ba hakbiit feto iha ekonomia feto rural.
Plataforma ida nee importante halibur lina ministerial 17 ho banku BNCTL atu bele hakbiit feto nia ekonomia no liu-liu hodi bele asegura dezenvolvimentu neebe mak inklusivu neebe mak too ba iha area rurais sira fo oportunidade ekonomiku hodi hakbiit sira nia aan.
Nunee mos ho lina ministerial seluk mos hanesan iha MCI mos koperativa mos iha SEFOPE mos iha, no lina ministerial sira neebe mak iha sira nia atividade prinsipal mos atu empodera feto.
Prezidente Konselhu Diretoria Rede Feto Timor Leste, Zelia Fernandes hatete, komemorasaun ba loron nasional feto nia monu iha 3 Novembru nuudar loron neebe didikadu ba iha feto sira nia kontribuisaun ba feto sira nia luta dezde inisiu too agora.
“3 Novembru nuudar loron neebe didikadu ba iha feto sira nia kontribuisaun ba feto sira nia luta dezde inisiu too agora, tanba nee ita dehan 48 anos laos 25 anos, ita bele dehan katak iha buat barak atinzi iknlui emasipasaun neebe inan feton sira luta 74 no 75 mezmu seidauk iha balansu,” katak nia.
Nunee mos Ministru Komersiu no Industria, Filipus Nino Pereira hatoo parabens ba Feto iha Timor Leste laran tomak neebe mak selebra loron feto neebe monu iha loron 3 Novembru.
Ministru hatete, iha loron importante nee hotu-hotu hamutuk hodi halo refleksaun no hamutuk oinsa mak luta ba direitu feto hodi fo espasu mos ba feto sira.
“Loron Nasional ida nee ita hotu-hotu halo refleksaun, no ikus liu mos hatoo agradese ba Uniaun Europeia husu kontinua hamutuk ho sosiedade sivil ho ita boot sira nia apoiu neebe mak durante nee diak tebes laos ba Governu, maibe direita ba sosiedade sivil hodi hakbiit feto iha ekonomia,” hakotu nia.
(eme)
