DILI, STLTIMORLESTE.com – Prezidente Republika (PR), Jose Ramos Horta hatete, Timoroan 30% mak oras nee koalia ona lian português maibe presiza dezenvolve diak, tanba Timor nia lian ofisial mak tetun ho português.
Prezidente Republika Jose Ramos Horta hatoo kestaun nee ba jornalista sira iha Timor Plaza Sabadu nee (03/05/2025) hatete, iha loron 5 Maiu hanesan loron mundial ba lian português, iha biban nee Prezidente husu atu dezenvolve diak liu tan.
05 Maiu loron mundial ba língua português, oinsa Prezidente nia observasaun ba lingua português iha Timor Leste, hatan ba kestaun nee, Prezidente hatete, tuir nia haree lingua português ohin loron dezenvolve makaas, tanba Timoroan husi kiik no joven hahu koalia ona português, ida nee presiza dezenvolve diak liu tan ba oin, laos lian português deit maibe tetun, lian indonezia no inglês.
“Hau haree lingua português dezenvolve makaas dezde 2000 too mai agora ita haree 30% resin mak koalia, uluk nein labarik oan ida koalia, agora rihun ba rihun iha Timor Leste koalia, joven sira atus ba atus iha universdade sira koalia, portantu atu hametin lingua laos tinan 1 tinan 10.
Prezidente Republika hatete, konforme Governu nia dadus no estatistika 30% nee diak tebes no aas nee tenke kontinua no kontinua dezenvolve moderniza liu tan lingua tetun para lingua nee forte hanesan lian indonezia.
“Tetun o bele hatene lingua ida ke funsional 10% ita idak-idak hakerek koalia konforme mai iha ulun mais nee mos normal neineik neineik lingua tetun sei sai lingua ida dinamiku forte hanesan bahasa indonezia, bahasa indonezia mos iha liafuan português barak los tetun mos nunee, maibe hau mos defende bahasa indonezia 40% hau la hatene lo-loos koalia bahasa indonezia,” katak PR Horta.
Prezidente dehan, tenke haree oinsa hasae estatutu lian indonezia iha Timor Leste, aleinde nee lian ingles mos iportante tebes, maibe lian pfisial Timor Leste mak tetun ho português, lian rua tane malu.
“Ita haree dezenvolvimentu iha tetun nee tane makaas ba português,” hakotu Prezidente republika Jose Ramos Horta.
(eme)
