BAUKAU, STLTIMORLESTE.com – Tuir planu loron 12 Fevereiru nee, Primeiru Ministru (PM) Kay Rala Xanana Gusmão mak ofisialmente sei lansa fatuk dahuluk ba projetu konstrusaun merkadu Munisipal Baukau iha Tuanau, Munisipiu Baukau.
Xefe ekipa konjunta atual Sekretariu Munisipal Planeamentu Investimentu no Dezenvolvimentu (PIDI), Eduardo Filipe Ximenes hateten, relasiona serimonia lansamentu fatuk dahuluk ba projetu konstrusaun merkadu Munisipal Baukau neebe tuir planu realiza iha loron 12 Fevereiru nee, mak Autoridade Munisipiu Baukau liu husi ekipa sira husi Diresaun Servisu Munisipal Jestaun Merkadu, Saneamentu no Bombeiru hamutuk ho ekipa Ministeriu Komersiu no Industria no parte kompanhia implementador halo ona limpeza no preparasaun ba serimonia refere iha fatin konstrusaun area Tuanau, merkadu Munisipal Baukau.
“Ohin ita halo ona limpeza, dia 12 nee sei halo lansamentu primeira pedra ba iha Merkadu Munisipal nee rasik, tuir ajenda sua exselensia Primeiru Ministru ho Ministru Komersiu no Industria mak sei mai lansa, maibe depende sua exelensia Primeiru Ministru nia tempu,” Sekretariu Munisipal Planeamentu Investimentu no Dezenvolvimentu, Eduardo Filipe Ximenes hatete ba jornalista sira iha fatin preparasaun ba serimonia lansamentu fatuk dahuluk, Tuanau, Tersa (10/02/2026).
Nia sublina, fatin konstrusaun ba Merkadu Munisipal Baukau utiliza rai hektares 3 resin, neebe bainhira finaliza bele akomoda ona vendedores sira neebe daudaun halerik ba fatin no seluk tan, tanba tuir dezenhu Merkadu Munisipal Baukau nian neebe iha, modernu no kompleta ho fasilidade hotu.
“Antes ita muda sai vendedores sira balu kritika no balu apoiu, maibe buat sira nee normal neebe esperansa mak nee, konstrusaun neebe halo saida mak durante nee sira mehi no husu ba Governu Sentral no lokal mak ita sei lansa Merkadu Munisipal neebe ho kualidade no modernu,” Eduardo komenta.
Iha sorin seluk, vendedores Fortunato da Costa agradese ba Governu, tanba durante nee hanesan vendedores iha merkadu Tuanau sente triste, tanba kondisaun merkadu la seguru, maibe iha esperansa ba konstrusaun merkadu foun neebe tuir planu sei lansa fatuk dahuluk iha loron 12 Fevereiru nee.
“Merkadu foun neebe Governu atu halo nee ami haree ona nia gambar iha Facebook, maibe tebes hanesan nee ga lae ita seidauk hatene, maibe halo mak tebes hanesan iha foto neebe ami haree nee diak, tanba iha jardim, kareta nia para fatin mos iha,” Fortunato katak.
Tuir vendedores nee katak, dezenhu ba Merkadu Munisipal Baukau neebe sira asesu iha media sosial modernu tebes, tanba iha jardim, estrada tama no sai inklui portaun ba ema lao ain sira husi sorin sorin.
Entretantu projetu konstrusaun merkadu Munisipal Baukau responsabiliza husi kompanhia Nasional Suhurama Developer Lda, ho valor orsamentu milhões US$ 8 resin ho durasaun servisu tinan 2.
(tom)
