DILI, STLTIMORLESTE.com – 12 Novembru loron neebe importante tebes, loron nee fo atensaun ba mundu nia matan hodi apoiu ba auto determinasaun.
Kestaun nee hatoo husi Diretor Ezekutivu FONGTIL, Valentin da Costa Pinto ba jornalista iha salaun Fokupers Farol, Segunda (11/11/2024).
Nia hatete, 12 Novembru loron neebe importante tebes ba povu TL, tanba ho loron nee mak loke mundu nia matan hodi apoiu TL ba auto determinasaun.
“Loron importante neebe fo atensaun ba mundu internasional, hodi bele apoiu ba luta auto determinasaun nia. Neebe ita kontinua haree, maibe depois tinan 33 ita haree katak tinan ida nee, tinan neebe importante tebes husu foinsae Timoroan sira atu kontinua valoriza, no dignifika ba eroi sira nia luta hodi hatuur iha asaun konkretu sira, nee hatudu katak tinan sira ba oin ita presiza tebes joven sira neebe barani, hatudu maturidade hodi bele halo inisiativa ruma, oinsa mak bele ultrapasa dezafiu neebe ita hasoru iha ita nia rai,” katak nia.
Nia hatete, joven sira nafatin lao tuir eroi sira nia ain fatin sai hanesan autor ba mudansa, autor ba transformasaun sira neebe ezije bele hetan iha TL.
Nunee mos Diretor Luta Hamutuk, Jose Alves hatete, 12 Novembru loron joventude nia.
“Hau hanoin tinan 33 ita komemora loron juventude nian neebe monu iha 12 Novembru, ida nee hanesan lisaun aprende ba joven sira agora, tanba joven agora nia mentalidade la hanesan ho joven uluk, ita nia joven sira agora nee hanoin luta nee hotu tiha ona, afinal injustisa sosial nee mosu barak iha ita nia rai, esplorasaun husi ema Timoroan ba Timoroan barak la halimar, maibe joven nafatin mete mak grupu,” nia tenik.
Nia hatutan, joven uluk ho hanoin ida hamutuk oinsa mak bele lori rai nee ba hetan auto determinasaun, maibe joven agora ladun fo kontribuisaun oinsa mak haree ba problema sosial neebe iha.
Espera ho tinan 33 selebra loron Juventude 12 Novembru nee, bele memoriza fali juventude sira para oinsa mak banati tuir hahalok diak husi joven rezistensia sira halo iha pasadu, hodi kontra inimigu.
(eme)
