DILI, STLTIMORLESTE.com – Padre Abel Soares Alves hatete, 12 Novembru 1991 hanesan loron istoriku ba Timoroan sira nia luta ba ukun rasik aan.
“Loron 12 Novembru loron istoriku ida ba ita, hodi sai loron juventude neebe fo aan tomak ba rai nee, defende lia loos, defende justisa too sira mate, tanba nee atividade ba foku ba joven sira iha tempu independensia nian, oinsa mak lori joven sira bele prienxe, uluk luta fo aan ba mate, ohin loron joven sira independensia, ukun aan nian sira prienxe saida,” hatete Padre Abel ba STL liu husi telefone, Tersa (12/11/2024).
Pe. Abel hatete, reflesaun sira sei toka ho ida nee, atu nunee sira bele sai autor ba dezenvolvimentu, nuudar foinsae no aban bainrua kontinua lori rai nee ba oin tuir ema hotu hakarak, husu ba joven sira nuudar kontinuadores ba konstrusaun rai ida nee, dezenvolve rai ida nee hodi lori nasaun nee ba oin.
Tanba nasaun nee nia futuru mak iha joven sira liman, nunee husu atu sira mos tenke prepara aan diak, oinsa mak sira bele kaer metin istoria lisaun rai ida nee nian hodi dezenvolve tuir ninia istoria rasik, tan nee sira tenke kapasita aan didiak haree no hadomi rai no povu ida nee atu halo ema hotu bele koko duni ukun aan nee ninia rezultadu bele goza duni ukun aan ida nee nian ksolok.
“Dezenvolvimentu tenke lori benefisiu ba ita nia povu tomak, hanesan sira uluk fo aan ba mate hodi liberta rai no povu ida nee, kontinuasaun ba oin nuudar joven futuru ba nasaun nian,” hatete Padre nee.
(joa)
