DILI, STLTIMORLESTE.com – 12 Novembru loron neebe marka istoria Timor Leste no loron neebe importante tebes no loron neebe hodi hanoin hikas luta nain sira nia sakrifisiu.
Kestaun nee hatoo husi Eis Primeiru Ministru atual Sekretariu Jeral Partidu FRETILIN, Mari Alkatiri ba jornalista sira liu husi nia mensajen ba loron 12 Novembru neebe sei selebra iha loron balun tuir mai, iha Salaun CCF Komoro, Kinta (07/11/2024).
Sekretariu Jeral Partidu FRETILIN, Mari Alkatiri hatete, 12 Novembru loron marka istoria duni, hakarak ka lakohi loron nee sai istoria duni ba povu Timor Leste.
“Loron 12 Novembru loron neebe mak marka istoria, hakarak ka lakohi nee sai istoria duni, lo-loos nee loron neebe mak marka istoria nee loron ita hotu nia, laos tinan-tinan ba hatudu deit katak loron nee marka iha ita nia istoria, maibe ba atu halo saida mak motiva sira,” dehan SEKJER Mari.
SekJer hatete, monumentu 12 Novembru neebe mak desidi husi primeiru Governu atu harii nee komesa lao.
“Atu desidi halo monumentu 12 Novembru nee iha primeiru Governu too agora harii, sira la halo hau halo fali sira dehan hau mak sala, entaun ida be halo nee mak sala fali, entaun hau halo maske ho rekursu nee oituan, uluk iha primeiru Governu pose iha 20 Maiu no 28 Novembru nee data nasional tama iha proklasaun unilateral, Prezidente Republika iha tempu neeba hotu-hotu hatene se? ba halo deklarasaun iha neeba hau seidauk iha orsamentu no osan neebe hau gasta nee mai husi osan restu husi UNTAET, seidauk iha orsamentu hau nia rasik,” katak Mari.
Eis PM hatete, iha mandatu Primeiru Governu nia rasik seidauk iha orsamentu, maibe Prezidente Republika iha primeiru mandatu deklara katak, Timor Leste deklara ona indepedensia fulan 6 ona maibe povu sei kiak nafatin no Eis PM hatete nia fo parabens tanba iha uma mos sei kiak nafatin.
“Fulan 6 deit seidauk iha orsamentu no Prezidente Republika nee mak agora Primeiru Ministru nee, maibe agora tinan hira ona mak sai Primeiru Ministru komanda Governu, maibe povu kiak ba beibeik,” katak nia.
Nia hatete, eroi sira fo aan ba mate ho mehi ida hakarak rai nee sai livre ba povu tomak hakarak moris diak.
Nia haktuir tan katak, tuir nia haree ohin loron povu sei moris kiak, tanba ukun ho odi no vingansa deit, depois hakarak halo rekonsiliasaun ho povu husi povu vizinhu para hetan votus, maibe iha rai laran deit nakonu ho odiu no vingansa.
“Nee tanba hakarak deit sira nia votus nee mak lalos, hau la presiza votus ba ema ida, maibe kadeira neebe mak hau tuur nee husik hau tuur lai, hau dehan kedas iha FRETILIN nia leet tenke iha plataforma ida interjerasional para bele provoka mudansa nee hotu-hotu hatene orientasaun neebe hau fo atu provoka mudansa nee hau nia intensaun iha FRETILIN hakarak ka lakohi ema gosta ka la gosta FRETILIN rai nee aban bainrua iha rekursu ka laiha rekursu sei entrega ba FRETILIN, tanba sira seluk hatama bolsu nakonu sei ba fatin seluk,” dehan Mari.
Nia haktuir tan katak, ho Orsamentu Jeral Estadu ba tinan 2025 ema hotu tenke buka, tenke iha intedimentu katak gasta menus maibe tenke halo diak ba povu.
(eme)
