BAUKAU, STLTIMORLESTE.com – Profesores sira iha Eskola Ensinu Baziku Primeiru Segundu Siklu Filial Lutumutu, Suku Tirilolo, Postu Administrativu Baukau Vila, utiliza deit varanda eskola sai fatin eskritoriu.
Profesor EBF Lutumutu, Francisco da Costa Pinto esplika, inisiu estabelese Eskola Ensinu Baziku Filial Lutumutu iha deit sala ba estudante hamutuk tolu (3) no laiha eskritoriu ba profesores sira, nunee obrigatoriu didin varanda eskola sai eskritoriu ba profesores sira hodi asegura dokumentus eskola nian.
“Inisiu kuandu eskola nee harii eskola nee sala tolu (3) deit, edifisiu ba ami profesores laiha, ami utiliza varanda eskola hanesan eskritoriu ba profesores sira too agora” hateten Profesor Francisco ba jornalista STL iha Lutumutu Tirilolo, Kuarta nee (02/07/2025).
Nia sublina, relasiona utiliza varanda eskola sai eskritoriu ba profesores sira enfrenta difikuldade barak, tanba laiha espasu ba profesores sira atu tuur ho distansia no sasan eskola nian neebe asegura iha eskoritoriu profesores hanesan livru planu ba profesores sira no sasan seluk tan sempre lakon, tanba fatin eskritoriu refere didin ho kalen neebe kuaze fo espasu ba ema deskonhesidu foti sasan eskola nian.
Nia fundamenta, preokupasaun refere antes nee hatoo ona ba Ministeriu Edukasaun, tanba aleinde eskritoriu ba profesores, sala ba estudante mos menus no laiha edifisiu biblioteka hodi asegura livru ba estudante neebe ministeriu apoiu.
“Difikuldade seluk mak sala ba estudante, agora nee tolu deit (3), la sufisiente, estudante sira uza maibe kondisaun dodok hotu ona, agora provizoriu ami didin ho kalen no biblioteka ba estudante mos laiha,” Francisco akresenta.
Nia deklara, EBF Lutumutu kompostu estudante sala neen (3) neebe rejistu husi primeiru anu too sestu anu, maibe sala la sufisiente, tanba iha deit sala tolu (3), nunee obrigatoriu tenke fahe ba turnu dader no loraik.
Maibe kondisaun eskola daudaun nee aat no grave, tanba didin deit ho piku neebe kuaze aat, maibe kontinua utiliza, tanba satan ho kalen.
Aleinde husi preokupasaun sira nee, EBF Lutumutu mos laihan sala biblioteka hodi asegura livru manual ba estudante sira neebe ministeriu fo apoiu.
“Ho ami nia difikuldade ida nee ami hakarak hatoo ba Ministeriu Edukasaun se bele karik hadia ami nia eskola nee, maizumenus ami hetan sala neen (6) hanesan nee para ami hanorin bele diak,” Francisco rekomenda.
Liga asuntu nee STL tenta konfirma Diretor Servisu Munisipal Edukasaun Baukau, maibe laiha fatin atu fo komentariu, tanba sei iha Dili.
Entretantu EBF Lutumutu iha profesores nain 10 no total estudante rejistu husi primeiru anu too sestu anu hamutuk 191, kompostu husi feto no mane.
(tom)
