DILI, STLTIMORLESTE.com – Verifikasaun dokumentu aplikantes sei finaliza iha semana nee nia laran no loron 15 fulan Maiu 2025 hahu halao teste ba aplikante bolsa kandidatu profesores ba iha nivel Sekundariu Jeral no Tekniku Vokasional.
Lia hirak nee hatoo husi Diretor Nasional Rekursu Umanus Ministeriu Edukasaun, João Amaral ba STL iha nia knaar fatin Vila Verde, Dili, Segunda nee (28/04/2025).
“Semana ida nee nia laran ita sei finaliza ba verifikasaun dokumentus aplikantes bolsa kandidatu profesores sira nian. Tanba nee teste nee rasik sei halao iha loron 15 fulan Maiu, nee data neebe mak fiksu ona ba iha teste ninia. Tuir lo-loos teste nee halo iha 8 Maiu, maibe ami sei haree fila-fali, tanba nia numeru ezame nee boot los, ita sei hadia halo didiak para labele mosu problema,” nia afirma.
João dehan, loron 15 fulan Maiu nee, loron neebe mak fiksu ona atu halao teste ba aplikantes bolsa kandidatu ba nivel Ensinu Sekundariu Jeral no nivel Ensinu Tekniku Vokasional, teste nee rasik uza sistema eletroniku, sei halao iha edifidiu Komisaun Funsaun Publiku (KFP). Pur volta rihun 11 resin mak aplika vaga ida nee, maibe seidauk bele fo sai hira mak pasa iha selesaun dokumentus.
Iha parte seluk, Beatriz Nunes da Costa hanesan aplikantes dehan, nuudar aplikante neebe konkore ona vaga rekrutamentu bolsa kandidatu profesores husi Ministeriu Edukasaun, hein deit informasaun bainhira mak atu halao teste ba sira, maibe garante katak sei pasa iha selesaun dokumentus, atu nunee bele partisipa iha teste.
“Nudar aplikantes prepara estuda, tanba dokumentus hatama ona, hein rona fali informasaun iha selesaun dokumentus ninia. Hau nuudar aplikante neebe konkore ona vaga rekrutamentu bolsa kandidatu profesores husi MinisteriuEdukasaun, hein deit informasaun bainhira mak atu halao teste ba sira, maibe garante katak sei pasa iha selesaun dokumentus nunee bele partisipa iha teste,” nia komenta.
Nia akresenta, antes partisipa iha teste, primeiru tenke prepara aan ho diak, liu-liu materia neebe mak atu sai teste nee, prepara aan para bele hafasil iha teste, tanba teste nee rasik sei uza eletroniku.
(jac)
