DILI, STLTIMORLESTE.com – Konselhu Superior Majislatura Judisial liu husi reuniaun foti desizaun balu kona-ba disiplinar no averiguasaun neebe halao ba iha Juiz no Ofisial Justisa sira.
“Iha tinan 2024 pelu menus Konselhu halo reuniaun liu husi 20 resin, maioria reuniaun sira nee koalia deit, hanusa mak prosesu disiplinar neebe kontra Juiz sira,” dehan Prezidente Tribunal Rekursu (PTR), Deolindo Dos Santos ba jornalista sira iha Kaikoli, Dili, Kuarta (05/02/2025).
Nia hatutan, prosesu disiplinar hasoru Juiz sira iha, tanba prosesu balu neebe sidadaun sira hatoo keixa, balu husi inspesaun mak deskobre.
Tanba Konselhu sai hanesan Tribunal ba Juiz sira ba iha prosesu disiplinar sira.
Tuir dadus neebe iha, husi loron 01 Janeiru 2024 too iha 31 Janeiru 2025, ba iha prosesu disiplinar ba advertensia ida, prosesu disiplinar ba pena multa ida, prosesu disiplinar ba suspensaun no ezersisiu tolu, prosesu disiplinar ba demisaun ida, prosesu disiplinar ba motivu seluk iha rua, no husi numeru neebe iha prosesu disiplinar hamutuk 8.
Tuir dadus nee mos, prosesu averiguasaun ba arkivamentu lima, prosesu averiguasaun represaun eskrita ida, prosesu averiguasaun suspensaun guarda desizaun rua, prosesu averiguasaun konversaun disiplinar tolu, prosesu averiguasaun motivu seluk ida.
No prosesu kona-ba pena suspensaun ba iha suspensaun ezersisiu ida, no prosesu neebe deside ona hamutuk rua nulu.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, Konselhu tenke halao nia servisu hodi haree ba Juiz sira, atu nunee Juiz sira mos halao knaar tuir lei neebe iha.
“Hau hanoin importante Konselhu nia servisu, saida mak sira halo bele hadia diak liu tan Juiz sira nia servisu,” dehan nia.
(ter)
