DILI, STLTIMORLESTE.com – Assosiasaun Defisiensia Timor Leste (ADTL) iha 2025 sei esforsu halao formasaun ba maluk defisiensia sira iha terenu.
Lia hirak nee hatoo husi Koordenador Emproment iha ADTL, Evaresto da Conceicao ba STL iha nia knaar fatin, Tersa nee (15/10/2024).
“Ami iha ADTL nee iha programa tolu, ami iha programa edukasaun, kapasitasaun no ami iha programa advokasia, nomos ami iha programa impoderamentu, ami iha programa impoderamentu nee mak liga ba iha inkluzaun sosial neebe mak ita halo, liu-liu ba setor sira neebe mak direitu ba ema ho defisiensia,” nia deklara.
Nia dehan, nee duni 2025 nee sira sei esforsu nafatin, liu-liu fo formasaun ba sira, ho nunee sira bele konhese moris neebe mak sira hasoru iha terenu, nee ekipa sira sei fo uluk formasaun ba sira, atu nunee bele loke uluk sira nia hanoin para sira bele kontinua iha hanoin sira neebe ema defisiensia sira hasoru.
Iha fatin seluk, Lourdes Moniz Nunes de Jesus hanesan defisiensia hatete, oinsa mak instituisaun relevante, liu-liu instituisaun neebe tau matan ba ema ho defisiensia bele tau matan nafatin ba maluk hirak neebe mak daudaun nee hela iha area remotas sira.
Nunee mos Diretor Ezekutivu ADTL, Cesario da Silva dehan, ADTL nia programa prioridade neebe mak tau matan nafatin ba ema ho defisiensia sira, liu-liu hirak neebe iha area remotas sira, oinsa bele asesu informasaun ba asesu edukasaun formal no non formal ninia.
(jac)
