DILI, STLTIMORLESTE.com – Governu liu husi Ministeriu Interior (MI) daudaun nee identifika ona membru Polisia Nasional Timor Leste (PNTL) besik 100 resin sei tama ba reforma iha 2026 mai, tanba idade avansadu ona.
Haktuir Ministru Interior (MI), Francisco da Costa Guterres ba jornalista sira iha edifisiu MI Vila Verde, Sesta (15/08/2025).
Nia dehan, planu ona iha tinan oin sei iha reforma ba membru polisia neebe idade 60 tenke reforma obrigatoriu. Ida ofisiais superior sira tinan 62, entaun tinan oin tama ba reforma.
“Ita planu ona iha tinan oin sei iha reforma ba membru polisia neebe idade 60 tenke reforma obrigatoriu. Ida ofisiais superior sira tinan 62. Entaun tinan oin tama ba reforma, maibe ita sei hahu uluk ba sira neebe labele liu ona halo servisu nee ita haruka sira ba reforma,” hatete Ministru nee.
Nia tenik, reforma ba membru polisia idade avansadu ona nee reforma ho ida dignu no sei prepara kondisaun ba sira.
Maibe molok aplika reforma ba membru polisia sira, ministeriu sei diskute uluk.
“Ita sei diskute hodi haree lai mekanizmu sira nee hotu, depois mak bele deside ba reforma, nunee membru polisia sira idade labele ona servisu ba reforma karik, ita prepara ona kondisaun ba sira,” nia esplika.
Ministru nee mos rekonese katak, daudaun nee membru polisia sira balu servisu kontribui ba seguransa ba povu no nasaun iha instituisaun PNTL kleur ona, nunee sira mos tenke fila ba reforma hodi bele deskansa.
Nunee bele fo fali oportunidade ba ajénte no ofisiais polisia foun sira neebe daudaun nee hahu halo rekrutamentu foun iha tinan 2025.
Tanba nee, daudaun nee Ministeriu Interior hamutuk ho Komando PNTL identifika ona membru polisia sira idade avansadu labele ona halao servisu hamutuk nain 100 resin.
“Ita iha ona dadus, tanba ita identifika ona membru polisia ema nain 100 resin, sira nee sei reforma iha tinan oin mai”, nia deklara.
Nia informa, membru Polisia nain 100 identifikadu tama reforma nee laos deit sira neebe daudaun nee halao servisu iha Dili, maibe foti hotu sira iha munisipiu inklui RAEOA.
Nia deklara, governu liu husi Ministeriu Interior hamutuk ho Komando PNTL sei prepara kondisaun ba membru polisia identifikadu reforma, hanesan simu salariu reforma nian, tratamentu saude ba sira no seluk tan.
Nia hatutan, sira ba reforma para simu ona osan ida reforma nian iha INSS nee, depois iha tan buat balu neebe Komando PNTL sei haree, nunee bele reforma sira ho dignu.
(jen)
