DILI, STLTIMORLESTE.com – Tinan oin Governu liu husi Ministeriu Obras Pubiku (MOP) sei loke luan estrada husi ponte Aitarak Laran Palasiu Prezidensial ba too Bairu Pite, Kapela oin ho metrus 13-15.
Kestaun nee hatoo husi Ministru Obras Publiku, Samuel Marcal ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Segunda (01/09/2025).
Nia dehan, iha inkontru nee Prezidente mos fo hanoin atu asegura edifisiu sira, maibe koalia liu mak konaba estrada neebe sei loke husi ponte besik Palasiu Prezidente nia nee sae ba Bairru Pite mosu ba iha kapela nia oin.
“Entau Prezidente hakarak hatene loke estrada metru hira, entau hau mai informa deit katak, pelumenus presiza 13-15 metrus para bele halo mos paseu bele lao, ema defisiente, ema lao ain no bele mos kuda ai, kuda aifunan para ita nia sidade nee bele kapas liu tan,” dehan Ministru nee.
Nia hatete, sei fo mos espasu ba dormitoriu neebe sei harii iha Palasiu Prezidensial nia sorin nee no rai luan, tanba nee Prezidente husu atu fo mos ba embaixada balun. Maibe atu halo dormitoriu nee laos husi MOP maibe nee husi Palasiu Prezidensial nia kompetensia.
Iha biban nee Prezidente Republika Jose Ramos fo orientasaun ba Governu, liu husi Ministru Obras Publiku atu halo estrada iha urbana hadia ho modelu neebe diak oituan, ho tipu neebe bele mos atrai turistiku ou ema sira mai husi liur.
Prezidente Republika hatete, tinan oin halo konstrusaun husi Palasiu ba Bairru Pite presiza fo mos espasu ba fatin neebe sei halo dormitoriu iha Palasiu Prezidensial nia kotuk, nunee bele akumula sidadaun feto sira neebe husi foho mai halo estudu iha Kapital Dili.
Jornalista: Emerenciana Pinto
Jornalista: Domingas Gomes
