DILI, STLTIMORLESTE.com – Prezidente Republika (PR), Jose Ramos Horta sei kondekora Timoroan lubuk inklui mos estranjeiru lubuk mai ho background oin-oin iha Palasiu Prezidensial.
Serimonia kondekorasaun nee sei halao iha loron Tersa 26 iha Palasiu Prezidensial, iha eventu selebrasaun loron proklamasaun indepedensia ba dala-4.
Prezidente Republika, Jose Ramos Horta ba jornalista sira iha Konventu Madre Alma Segunda (25/11/2024) hatete, nia sei kondekora veteranus nomos Timoroan inklui mos estranjeiru lubuk ida.
“Aban kondekorasaun 26 Novembru ba veteranu sira iha Palasiu Prezidensial, Salaun Xina nee lista mai husi CCLN. Depois ba Timoroan sira husi background oin-oin, inklu estranjeiru balun hanesan Deputada Parlamentu Indonezia nian, tanba hau haree nia servisu iha Indonezia. Nia ho nia laen apoia Timor makaas, agora sira nain rua tur iha Jakarta hamutuk Parlamentu sira hakarak dada tan makaas apoiu Indonezia mai Timor, relasaun metin liu tan,” katak PR Horta.
Prezidente dehan, durante ferias ba iha Kupang laos ba han toba deit, maibe haree mos dezenvolvimentu oin-oin neebe mak sidadaun vizinhu sira halo.
“Depois hau ba ferias iha Kupang, Rote, Sumba laos ba hanesan toba han deit pasiar, maibe mos ba haree buat barak-barak halo, hakiak boek, kadiuk, ikan buat oin-oin haree no koalia ho sira atu sira halo iha Timor. Sira servisu ho Lorenco Ataúro nia suporta ona kadiuk Timor nian ba Singapura semana-semana, Lorenco Atauro nia ema matenek nia join projetu iha NTT sira servisu hamutuk farme kadiuk iha Tibar nee mak importante,” dehan Prezidente.
Nunee mos Deputada Republika Indonezia Julie Laiskodak hatete, sente onradu bainhira Prezidente Republika sei kondekora nia iha Timor Leste, iha selebrasaun 28 Novembru.
“Primeiru Prezidente ba hau nia uma nee hanesan ona onra ida, tanba laiha Prezidente ida bele ba too hau nia uma, ida nee ho onra boot ona. Prezidente ami hanesan uma nain iha dever atu haree, maske sae bis iha kalan no han Batar tuir dalan, ida nee ba ami sente haksolok hanesan uma nain, no Prezidente haree ami durante tinan 5 nuudar Governador NTT, tanba Prezidente ba antes no depois, tanba antes katuas seidauk sai Governu, PR Horta rasik haree baibain, maibe bainhira kaer kargu nuudar Governador Tinan 5 iha mudansa boot,” katak nia.
Nia hatete, tanba nee mak Prezidente hakarak buat neebe sira halo iha NTT bele fahe esperiensia mos iha Timor Leste, no prezidente rasik hatete koalia husi ibun deit labele, maibe kesi metin ho kondekorasaun, entaun iha nia prinsipiu mos hanesan bainhira kesi metin ona labele koalia deit, maibe tenke servisu.
“Hau sente Prezidente iha matenek atu kesi hau liu husi kondekorasaun, aban hanesan feto potensial atu enkoraja mos feto iha Timor Leste atu avansa dezenvolve familia no nasaun. Kondekora aban, depois mak hau sei hatudu prestasaun servisu hamutuk entre NTT ho Timor Leste iha futuru,” katak nia.
Nia hatutan, Timor Leste ho Indonezia hanesan nasaun vizinhu no belun, tanba nee nia mos prontu oinsa bele servisu hamutuk ba oin.
(eme)
