8 Setembru 2025 Hahu Loke Rekrutamentu Trabalhador ba Servisu iha Nova Zelandia

DILI, STLTIMORLESTE.com – Sekretariu Estadu Formasaun Profisional Empregu (SEFOPE), Rogeiro Araujo Mendonça hatete, iha loron 8 fulan Setembru 2025 hahu loke ona rekrutamentu trabalhador ba servisu iha Nova Zelandia.

Liafuan nee hatoo husi SEFOPE, Rogeiro Araujo Mendonça hafoin asina Memorandum of Understanding (MoU) ho Embaisadora Nova Zelandia iha Timor Leste (TL), Helen Tunnah, iha sala enkontru VIP SEFOPE Kaikoli, Kinta nee (21/08/2025).

“Ohin ita asina ona MoU, ami ohin halo ona diskusaun ho ekipa tekniku sira hotu katak iha dia 8 Setembru tinan nee hahu ona loke rekrutamentu ba joven sira neebe mak hakarak ba servisu iha Nova Zelandia,” dehan Rogeiro.

Nia dehan, kooperasaun servisu nee ba iha area rua, ida mak ba area Hortikultura no Fiftinkultura, nee faze ida primeiru neebe mak halo kooperasaun ba asina MoU ida nee.

“Hau hanoin kompanhia halo ona vizita trabalhu, kompanhia nee barak tebes, maibe ita boot sira hein katak fulan Setembru sira sei halo rekrutamentu, ho ida nee mak ami bele hatete katak total hira mak atu halo rekrutamentu ba joven sira hodi ba servisu iha Nova Zelandia.

Rogeiro dehan, numeru rekrutamentu nee labele publika lai no labele pronunsia uluk lai, maibe fiar katak empregador sira neebe mak presiza trabalhador sira atu ba servisu depois loke tiha vaga husi empregador sira neebe mak mai ona iha ita nia rai, bele hatene katak sira presiza ema ho kuantidade hira.

“Hau hanoin katak kriteria nee nia diferensia ho Australia nian, kriteria hotu-hotu nee hanesan maibe hau hanoin ita presiza mak kriteria ida neebe importante liu mak atu trabalhador ba servisu nee mak presiza hatene lingua inglês ho diak, maibe numeru rekrutamentu nee labele publika lai,” dehan nia.

Iha fatin hanesan, Embaixadora Nova Zelandia mai TL, Helen Tunnah dehan, asina MoU entre ajensia nee hanesan pasu tuir mai ba programa foun mobilidade laboral entre ita nia nasaun sira.

“Ohin hanesan loron neebe pozitivu tebes ba relasaun entre Timor Leste no Nova Zelandia asina akordu entre ajensia nee hanesan pasu tuir mai ba programa foun mobilidade laboral entre ita nia nasaun sira, ami nia Governu konkorda ona iha tinan kotuk atu inklui Timor Leste iha ami nia programa mobilidade laboral, ida nee sei apoia nasaun rua,” dehan Helen.

Helen dehan, ida nee sei ajuda empregador Nova Zelandia sira atu hetan trabalhador diak, husi nee sei tulun atu suporta rendimentu ba povu Timor Leste (TL) no dezenvolvimentu abilidade servisu nian.

(EST 1)