BAUKAU, STLTIMORLESTE.com – Bebe mane neebe ema deskonhesidu soe iha ponte Bebui, Suku Karaubalo, Postu Administrativu Vikeke, Munisipiu Vikeke, hakotu ona iis hafoin too iha hospital.
Komandante Komando Polisia Munisipiu Vikeke, Superintendente António Rego Fernandes informa, akontesimentu ema deskonhesidu soe bebe mane refere hetan husi sidadaun joven feto ida inisial TA, idade 18, iha loron 15 Junhu, pur volta tuku 08:00 dader, T.A ba mota refere objetivu atu fase ropa, derrepente hetan bebe nee no T.A hakfodak fila kedas ba uma hodi fo hatene ba nia inan aman too iha fatin haree bebe nee no halo kedas kontaktu Polisia hodi too kedas fatin evakua bebe refere ba Hospital Vikeke.
“Iha tempu neeba labarik sei dada iis hela, maibe too tiha hospital, doutor sira fo hariis pozisaun mate ona, agora sei rai hela iha neeba sei enkamina ba Ministeriu Publiku depois ba mortuariu nasional mak ba autopsia ga ba sosial ga nee Governu nia responsabilidade ona,” hateten Komadante nee ba jornalista STL liu husi telefone, Domingu (15/06/2025).
Nia sublina, bebe refere hafoin komunidade inan aman joven T.A informa ba Polisia too iha fatin haree kondisaun sei moris, nunee Polisia evakua kedas ba Hospital Munisipiu Vikeke hafoin parte doutor sira hamoos fo harii hafoin hakotu iis.
Bebe refere nia mate isin daudaun asegura iha sala mortuariu Hospital Vikeke no tuir planu sei transfere ba mortuariu nasional hodi submete ba prosesu autopsia ou lae depende desizaun.
Maibe parte Polisia Munisipiu Vikeke daudaun sei esforsu buka tuir autor ba kazu nee hodi submete ba prosesu, tanba nee krimi.
“Ita sei buka tuir suspeitu, se loos mak soe bebe ida nee, agora ita nia PNTL sira servisu sei enkamina ba Ministeriu Publiku husu orientasaun,” komandante nee akresenta.
Xefe Suku Karaubalo João Salsinha Pinto argumenta, ba kazu soe bebe nee ponte importante atu identifika autor mak rekolha evidensia liu husi CCTV iha loja Xina neebe lokaliza besik ponte refere.
“Kazu nee ita hakarak hetan lalais, orsida kalan hau organiza loja sira neebe asesu liu ba dalan nee, tanba iha loja Xina ida CCTV hadulas loos ponte nee, ita espera hetan buat ruma iha CCTV nee,” hateten João.
Nia informa, kazu soe bebe iha Suku Karaubalo akontese ona dala rua, dala ida akontese iha tinan 2008 rezulta bebe feto ida asu han hotu nia isin, enkuantu ba daruak daudaun bebe mane ida, maibe too hospital mate, nunee Autoridade Suku sei kolabora hamutuk ho entidades relevante sira iha nivel Munisipiu kria ekipa konjunta estabelese kria regras, ba sidadaun se deit tama iha Munisipiu Vikeke tenke informa aan ba Autoridade kompetente hodi hatene motivu prezensa iha Vikeke, tanba kazu dahuluk too ohin loron la detekta autor.
(tom)
