DILI, STLTIMORLESTE.com – Prezidente Republika, Jose Ramos Horta husu ba partidu politiku (Parpol) sira atu prepara kuadru partidu neebe hatene ekonomia, jestaun no hatene oinsa foti desizaun, hatudu matenek no disiplina, nunee iha futuru la bele halo moe nasaun kuandu tama ona Asosiasaun Nasaun Sudeste Aziátiku (ASEAN).
“Iha fulan outubru tinan nee, Timor Leste sai full membru ASEAN. Tanba nee, husu ba partidu politiku sira prepara kuadru partidu neebé hatene ekonomia, jestaun no hatene oinsá foti desizaun, nunee iha futuru labele halo moe nasaun. Alende nee, hatudu matenek no disiplina liuhusi reuniaun ruma labele falta no tarde, partisipa reuniaun sira, debate sira, estuda dokumentu sira hanesan orsamentu, nunee bele hatene foti desizaun,” hatete Prezidente Ramos Horta bainhira hato’o diskursu iha serimonia selebrasaun loron moris Partidu Demokratiku (PD) ba dala 24 iha Sede Nasional PD, Kolmera, Dili, Sabadu (14/6/2025).
Iha serimonia nee, Prezidente Ramos Horta, husu ba partidu jerasaun foun neebe lidera husi Mariano Assanami Sabino atu prepara-an partisipa eleisaun sira neebé sei mai hanesan prezidensiál iha tinan 2027 no eleisaun parlamentár iha tinan 2028.
Prezidente Ramos Horta admira tebes PD tanba partidu jerasaun foun nee eziste tinan 24 ona no aguenta to’o agora maske hasoru dezafiu oioin. Tanba nee, Prezidente Ramos Horta simpatia no fiar ba partidu ida nee tenke aguenta.
“Hau simpatia ho imi. Hau fiar partidu ida-nee tenke aguenta. Ita haree partidu kiik barak mosu la aguenta. Demokrasia no Governasaun iha nasaun nee depende mós ba imi. Tanba nee, imi organiza-an didiak, forma kuadru halo didiak hodi partisipa eleisaun sira tuir mai,” tenik Xefe Estadu.
Iha biban nee, Sekretariu Jeral Interinu PD, Francisco Borolaku lee mensajen husi Primeiru Ministru, Kay Rala Xanana Gusmao neebe felisita ezisténsia PD nian no pontu importante husi mensajen nee mak konsolidasaun demokrátika ba estadu no nasaun hodi garante armónia no estabilidade nasionál.
Xanana hatete, istória PD nian iha ligasaun ho kór oioin ba país nee nia istória. Istória neebé nakukun ho aktu korajen no hamutuk hodi halo esforsu ba propózitu ka objetivu komúm, hanesan harii país ida neebé forte no dezenvolvimentu timoroan tomak bele hetan oportunidade atu konkretiza mehi ho aspirasaun.
Atual Prezidente Partidu CNRT nee hato’o nia saudades boot ba fundadór PD, saudozu Fernando Lasama de Araújo no hato’o mos rekonhesementu ba estrutura tanba kaer metin vizaun Fundadór Fernando Lasama de Araújo, no rekonhese mós dedikasaun hodi fó lian ba grupu barak no timoroan tomak neebé hakarak kontribui ba dezenvolvimentu nasionál, hodi garante diversidade ideia, valór projetu ba país.
PD Mosu Hatutan Espiritu Funu
Nunee mos Prezidente PD, Mariano Asanami Sabino iha ninia diskursu hateten katak ezisténsia PD nian iha rai ida nee hakarak hatutan espíritu funu nain sira nian hodi konstrui estadu direitu demokrátiku. Ida nee mak PD nia kompromisu.
Atual Vise Primeiru Ministru nee dehan katak PD nia ezisténsia laós tanba partidu foun laiha, laos atu kompete, maibé PD hakarak kaer prinsípiu ida neebé Proklamasaun 28 Novembru proklama Repúblika Demokrátika Timor-Leste nee tenke sai lisan ba ulun no lisan ba moris nuudar sidadaun, povu Repúblikanu neebé orijen demokrátiku.
Iha serimonia loron moris PD ba dala 24 nee, Prezidente Komisaun Nasionál ba Eleisaun (CNE), José Agostinho da Costa Belo, husu ba PD atu realiza kongresu nasionál, nunee bele partisipa eleisaun sira tuir-mai hanesan eleisaun munisipal, prezidensiál no parlamentár.
Nia dehan, liuhosi kongresu bele hili lideransa sira ba futuru ho vizaun diak hodi konstrui nasaun ho diak.
Atual Reitor Universidade Dili (UNDIL) nee mos hatete katak daudaun nee iha loron 10 Junhu 2025, CNE halo programa preparasaun ba eleisaun munisipál, prezidensiál no parlamentár.
“Programa importante mak CNE halo daudaun nee mak edukasaun sívika muda nia modelu uituan, fó oportunidade ba prezidente partidu polítiku sira iha nivel munisípiu halo debate entre sira atu konhese liután katak fini nee laós iha nasionál deit, maibe fini bele mos mai husi munisipiu sira,” hatete Jose Agostinho.
Kona ba ida nee, Prezidente PD, Mariano Asanami Sabino dehan katak orienta ona Komisaun Organizadora atu hahú kongresu maibé tuir kultura PD nian tenke hahú ho konferénsia husi postu administrativu sira, kontinua iha munisipál mak realiza kongresu nasionál.
Nia dehan, data fiksu seidauk hatene maibé planu konferénsia no kongresu nasionál sei halao iha tinan nee nia laran, bainhira konferénsia postu administrativu no munisipál hotu ona kontinua kedas kongresu nasionál tanba kongresu nee atu konsolida forsa sira neebé husi baze.
Alein de nee, PD mós sei halo preparasaun figura kandidatu ba eleisaun sira tuir mai hanesan eleisaun munisipal, prezidensiál no parlamentár, nunee partidu rasik sei hili kandidatu nee bele iha kongresu nasionál ka depoiz kongresu sei halo konvensaun hodi deklara kandidatu prezidente.
Bupati Belu Hato’o Parabens
Iha loron moris PD ba dala 24 nee, Prezidente Partidu PD Munisipiu Belu, Provinsia Nusa Tenggara Timur (NTT), atual Bupati Belu, Willybrodus Lay ho nia Vise Vicente Hornai Goncalves hato’o parabens no haruka mos aifunan ba familia boot PD Timor Leste.
Aniversáriu PD ba dala 24 nee, hetan partisipa husi Prezidente Republika, Jose Ramos Horta, Tenente Jeneral Reformadu, Lere Anan Timur, Prezidente CNE, José Agostinho da Costa Belo, Prezidente Konsellu Kombatente Libertasaun Nasionál, Riak Leman, Vise Primeiru Ministru, Mariano Assanami, reprezentante Bupati Belu no reprezentante Parlamentu Nasional no konvidadus sira.
(mik)
