DILI, STLTIMORLESTE.com – Relasiona ho avizu balu bandu publiku atu labele sosa sasan iha labarik kiik oan sira neebe faan, Provedor Direitu Humanus no Justisa (PDHJ) konsidera katak ida nee laos abut husi problema.
“Hau haree iha fatin publiku iha papan boot sira nee, Institutu Nasional Defeza Direitu Criansa (INDICA) nia avizu no apelu sai ona iha neeba husu ba publiku atu labele sosa sasan sira husi labarik sira nee, hau la dehan ida nee la diak, maibe ida nee laos abut husi problema, abut husi problema nee familia,” dehan Provedor Direitus Humanus no Justisa, Virgilio da Silva Guterres ba jornalista sira iha salaun, Vila Verde, Segunda, (16/06/2025).
Nia hatutan, kuandu bem estar familia nian ita la garante, ita bandu labarik sira labele ba estrada nee saugati deit, kuandu estadu la garante posibilidade la garante asesu ba sidadaun sira atu hadia sira nia moris iha uma laran, hadia rendimentu familia nian, tanba nesesidade haruka oan sira ba buka moris atu sustenta.
Sublina tan, apresia esforsu neebe INDICA no entidade sira halo atu halo akompanhamentu ba labarik sira nee, maibe problema nia abut lo-loos nee iha politika Estadu nian, atu garante bem estar familia nian.
Nia reforsa, familia hotu-hotu iha Dili no foho inan aman sira iha asesu natoon ba atividade ekonomika iha asesu natoon ba servisu publiku sira atu hadia rendimentu familia nian, kuandu Estadu nia politika hadia rendimentu ona, Estadu iha autoridade atu bandu labarik sira labele faan iha neeba. Hanesan politika hasai ona bolsu estudu atividade ekonomia nian mak foin haree tanba sa sei husik labarik sira faan, maibe se familia sei moris kiak, ida nee mak sai abut husi situasaun nee.
Iha fatin ketak, Komunidade Suku Komoro, Miguel Da Silva dehan, Governu presiza kria ulun planu ida, oinsa hadia familia sira nia moris.
“Hau hanoin labarik sira mos dala ruma sira lakohi atu faan, maibe ekonomia uma laran mak obriga sira faan, tanba nee husu Governu atu kria planu ida diak oinsa reforsa familia sira nia moris, hodi redus haruka oan sira ba faan sasan,” dehan nia.
Hatutan tan, iha labarik balu fan sasan, tanba osan neebe sira hetan mak tulun sira atu ba eskola, liu-liu sosa sira nia presiza. Tanba nee husu atu ba oin kria uluk kondisaun ba labarik sira, no mos ba familia sira neebe ekonomia uma laran bele dehan la sufisiente.
(jen)
