DILI, STLTIMORLESTE.com – Ministeriu Publiku (MP) iha alegasaun ba krimi Violensia Domestika ho forma maus tratus, solisita ba iha Tribunal Koletivu atu kondena arguidu ho inisial TG pena prizaun tinan 2.
Iha alegasaun nee Prokurador Hernani Rangel mantein ho akuzasaun neebe iha, hodi husu Tribunal aplika pena prizaun tinan 2 ba arguidu, tanba provadu arguidu komete krimi hasoru lezada ho inisial SNA.
Aleinde nee defeza husu Tribunal tetu sirkunstansia hotu hodi aplika pena neebe kmaan ba arguidu.
Rona tiha alegasaun, Tribunal adia ba loron seluk hodi rona desizaun.
Tuir akuzasaun neebe iha katak, lezada SNA iha relasaun ho arguidu hanesan feen ho laen dezde tinan 2001, sira mos iha ona oan nain 4.
Iha loron 01 Junhu 2022, iha oras 08h30 dadersan, iha Delta Komoro, Dili, momentu neeba arguidu uza ain hodi tebe kona dala ida iha lezada nia kotuk, hafoin buti mos iha lezada nia kakorok, kauza moras.
Bainhira buti tiha lezada, arguidu sei kontinua nafatin hodi ain tebe tan iha lezada nia kotuk laran, rezulta lezada mos monu tun ba rai, kauza moras no halo mos lezada tanis.
Bainhira baku tiha lezada, arguidu mos tolok ona lezada hodi dehan ho liafuan mal.
Motivu husi problema nee tanba arguidu ho lezada diskute malu tanba deit osan neebe mak lezada rai hela hodi haree ba labarik sira nia presiza.
Durante arguidu ho lezada hola malu sempre iha agresaun fizika no mal trata husi arguidu.
Iha tinan 2003, data no fulan lezada haluha ona, arguidu uza liman hodi buti iha lezada nia kakorok, kauza moras.
Iha tinan 2014, data no fulan lezada haluha ona, arguidu foti bisikleta ida hodi riba ba lezada nia kotuk laran, kauza moras no halo mos dada iis la diak.
Iha tinan 2016, data no fulan lezada haluha ona, iha sira nia uma, momentu neeba lezada tur hela iha bidon leten, la kleur arguidu mai dudu lezada iha bidon leten halo monu tun ba rai, kauza lezada nia liman sikun hetan kanek.
Iha tinan 2018, arguidu baku tiha lezada, hafoin uza ain hodi sama tan lezada ba rai, kauza moras. Hodi buti iha lezada nia kakorok rezulta moras no halo mos lezada dada iis la diak.
Iha tinan 2022, iha fulan Maiu, data lezada haluha ona, arguidu uza liman hodi buti iha lezada nia kakorok rezulta moras no halo mos lezada dada iis la diak.
Konsekuensia husi arguidu nia hahalok nee mak halo lezada sinte moras iha kotuk laran, kakorok, tanba hetan tebe no buti beibeik husi arguidu.
Arguidu halo ho forma livre, deliberada no konsiente, hatene momos (ben sabendo) katak, uza ain hodi tebe, liman hodi buti bele halo moras no bubu, no halo beibeik agresaun fizika (mal trata) bele halo lezada hanoin barak ou triste maibe arguidu halo nafatin nia hahalok nee, hanesan meius ou instrumentu ida neebe mak apto no adekuadu hasoru lezada.
Arguidu mos hatene hela katak nia hahalok sira nee proibidu tuir lei penal.
Tanba nee arguidu TG hanesan autor material ba pratika krimi Maus Tratus tuir artigu 154 Kodigu Penal.
Audensia julgamentu nee prezide husi Juiz Koletivu, Ministeriu Publiku reprezenta husi Prokurador ida, arguidu hetan asistensia legal husi Defensor Publiku.
(ter)
