DILI, STLTIMORLESTE.com – Tuir dadus husi Servisu Saude Munisípiu Ermera (SSME) iha fulan Abríl too Junhu nee rejistu ona asu tata komunidade sira hamutuk 62, husi numeru nee nain 1 mak lakon vida.
Diretor Servisu Saúde Munisípiu Ermera (SSME), Domingos De Deus hatete, durante fulan tolu Servisu Saude Munisípiu Ermera (SSME) rejistu ona kazu asu tata hamutuk 62, hahu husi fulan Abríl too Junhu tinan 2025 inklui nain 1 lakon vida.
“Asu tata primeiru nee iha loron ida fulan Abríl lori too hospital mate kedas, total kazu neebe mak ami rejistu nee asu tata ema hamutuk nain 62, asu tata iha deit Railaku nee hamutuk ema nain 7, neebe durante fulan 3 SSME rejistu hamutuk 62,” hatete Servisu Saude Munisípiu Ermera (SSME) ba jornalista sira liu husi telefone, Segunda nee (23/06/2025).
Nia dehan, asu sira neebe mak tata komunidade nee ida mak pozitivu Rabies, no seluk la hatudu sitomas ida.
“Iha loron 16 fulan Junhu nee asu tata tan komunidade nain 2 iha Suku Matata, Postu Administrativu Railaku, asu nee pozitivu Rabies, agora pasiente nain 2 halo tratamentu, no asu tata tiha komunidade nain 2 depois nia tata nia maluk ida mate kedas,” nia informa.
Nia esplika, komunidade sira neebe mak hetan tata husi asu daudaun nee sira halo tratamentu, neebe seidauk hatene bainhira halo rekooperasaun tanba sira simu tratamentu nee durante fulan tolu.
“Ita seidauk hatene tanba nia masa tunas nee durante fulan tolu, nee ita foin bele hatene sira bele hetan rekooperasaun ka lae, tanba virus nee ita la bele prevene,” nia tenik.
Tanba nee Servisu Saude Munisípiu Ermera ho Autoridade Munisípiu Ermera halo intervensaun liu fahe informasaun no promosaun ba komunidade sira liu-liu Autoridade lokál sira nunee bele fahe informasaun ba komunidade sira.
“Agora daudaun ita halo hela intervensaun, ita fahe ona informasaun ba Xefe Suku sira, Administrativu Postu sira no nain Xefe Aldeia sira para atu halo prevensaun no fahe informasaun ba ita nia komunidade sira,” nia informa.
Nia koalia, kona-ba ai-moruk ba vasinasaun ba ema ne’ebé sufisiente no mos ida ai-moruk anti Rabies nee mos sufisiente hela hodi bele fo tratamentu ba komunidade sira neebe mak hetan ona tata husi asu.
Iha fatin ketak, Diretór Nasionál husi INSP-TL iha Ministériu Saúde, Nevio Sarmento infoma, Virus Raiva agora amesa tebes, los duni iha informasaun katak asu tata tan komunidade sira iha Postu Administrativu Railaku, Munisípiu Ermera, tanba nee komunidade sira simu ona vasina.
“Kazu asu tata duni iha Ermera, asu tata iha Railaku rejitu mos atu tata tuir infomasaun sira neebe mak ami hetan husi autoridade lokál sira katak, asu tata mos iha gizarudu iha ema nain 3 mak asu tata, nee mos hatoo ona mai ami katak, sira mos simu ona vasina, no asu sira neebe mak iha Gleno laran duni asu tata sira nain haat, ho nunee sira mos simu ona vasina, maibe kazu nee aumenta nafatin,” nia koalia.
Nia deklara, tanba nee Ministériu Saúde kontinua apela ba komunidade sira katak bainhira hetan asu tata tenke ba kedas fasilidade saude neebe mak besik atu hetan tratamentu.
“Tanba nee mak ami apela nafatin ba populasaun katak, komunidade sira neebe mak asu tata halo favór hakbesik aan nafatin ba sentru saude sira, iha tempu neebe mak ami entrevista kazu asu tata nee akontese nafatin. Tanba nee mak ita fanu nafatin komunidade sira bainhira asu tata halo favór hakbesik nafatin ba sentru saúde neebe mak,” nia informa.
Kona-ba halo teste nee Kompetensia husi sira Saude Animál ninia, maibé Ministériu Saude no mos Ministériu Agrikultura Pekuária Peskas kontinua servisu atu bele halo intervensaun ba virus Rabies.
Entretantu tuir dadus neebe STL asesu husi Ministériu Saúde liu husi Institutu Nasionál Saúde Públika Timor Leste hamutuk ho Diresaun Nasionál Veterinaria iha Ministériu Agrikultura Pekuaria fo sai katak, hahu husi tinan 2024 Sistema Vizilansia Saude Nasional Rejistu ona 1.445, husi numeru nee asu 96 Pozitivu Raiva.
(jen)
