DILI, STLTIMORLESTE.com – Komisaun Anti Korupsaun (KAK) foin lalais nee bolu Prezidente Autoridade Munisipiu (PAM) Aileu hodi halo identifikasaun, laos halo buksa no aprensaun.
“Komisariu esklarese no klarifika katak, Aileu nian PAM nee ita ba notifika nia mai halo identifikasaun hodi presta deklarasaun, ita la.ba halo buksa no aprensaun,” dehan Komisariu KAK, Rui Pereira ba jornalista sira iha Farol, Tersa (24/06/2025).
Nia esplika, halo identifikasaun mak lori PAM mai iha KAK, ida nee bele rona diretamente iha nia fatin, bele bolu mai iha KAK.
Sublina, PAM Aileu nian notifika nia mai halo identifikasaun iha KAK, presta informasaun inisial kona-ba kazu neebe mak nia envolve aan ba.
Esplika tan, la halo buksa no aprensaun, tanba halo ida nee dentru flagrante delito durante 72 horas, maibe ba iha PAM Aileu nian ita halo identifikasaun, tanba nee mak lori mai iha KAK.
Afirma, hanesan KAK sese deit mak identifika mai fo informasaun, se nia la satisfaz ho buat balu direitu ninian hodi halo prosesu, maibe nia tenke komprende sasan neebe nia ba halo kontesta hasoru KAK nia servisu.
Reforsa, tuir regra bolu ema ida atu halo identifikasaun ba mak foin entrega mandadu ba nia, se ita fo antes bele iha pozitivu no negativu, se balu hatene bele desvia tiha buat ruma ita labele hetan. Tanba nee KAK hanesan Polisia Investigativu Kriminal ida bele ba kedan iha loron nee kedan, no ida bele fo informasaun antes mak foin ba.
Dehan tan, hanesan autoridade publiku se jornalista sira mai buat ruma se la kontente bolu fali jornalista sira halo klarifikasaun, labele jornalista halo publikasaun dehan ida nee lalos.
Komisariu dehan, buat sira neebe ema keixa hasoru ita tenke ba hatan, atu sala ka los nee konforme provas neebe autoridade sira produs, ka KAK mak produs, ka MP mak produs depois mak ba hatan iha Tribunal.
Tanba nee odiu no vingansa mak labele, maibe buat ida krimi nee haree ba iha nia regra. No kona-ba PAM nian nee foin lalais nee ba halo identifikasaun, ida nee kompetensia KAK nian.
Hatan kona-ba foin lalais KAK ba iha Manatutu, nia parte dehan KAK ba halo buska.
“Kazu PNDS iha Manatutu nian ita halo pedidu ba iha Ministeriu Publiku no Ministeriu Publiku halo pedidu ba Tribunal no Tribunal hasai ona despaisu autorizasaun mak ita ba halo buska, ida nee kazu PNDS iha Manatutu nian,”.dehan Komisariu.
Iha fatin ketak, Akademiku UNTL, Simiao dos Santos dehan, KAK iha papel hodi halo identifikasaun kuandu simu keixa ruma.
“KAK iha papel importante hodi halo identifikasaun, tanba nee banhira KAK bolu koopera atu servisu KAK nian bele lao ba oin,” dehan nia.
Hatutan tan, hotu-hotu tenke apoiu servisu KAK nian lao ba oin, tanba servisu KAK nian importante atu prevensaun, tanba nee KAK kuandu bolu se deit kiopera diak liu tan. Tanba liu husi koopera mak foin deskobre lo-loos saida mak iha nee los ka lalos.
(ter)
