DILI, STLTIMORLESTE.com – Sua Eminencia Dom Virgílio Cardeal do Carmo da Silva, iha loron Tersa nee (01/07/2025) selebra misa iha Prizaun Bekora, hodi halo inaugurasaun ba iha Gruta Santo Antonio de Lisboa, no mos fo krizma ba iha dadur hamutuk nain 97 inklui sarani sira balu.
“Ba ita nia maluk sira hela iha neeba festa Santo Antonio ita selebra hamutuk, fo parabens ba sira tanba husi sira nia grupu iha 97 pesoas mak ohin simu sakramentu krizma, sai mos hanesan momentu furak ida atu hasoru sira no koalia uitoan ho sira,” dehan Amu Cardeal iha nia liafuan badak ba dadur sira, iha Prizaun Bekora,Tersa nee.
Dom Virgilio dehan, enkoraja sira no fo eperansa ba sira, no tinan ida nee mos tinan zubiliu esperansa nian fo nafatin laran metin ba sira, atu hakbesik aan ba Maromak ho situasaun neebe sira enfrenta.
Dom Virgilio afirma, sira preparasaun diak ba iha eukaristia nee, tanba nee reza ba sira atu momentu ida nee sai mos momentu ba sira bele halo reflesaun ba sira nia moris bainhira sira pasa iha fatin ida nee.
Dom Virgilio mos husu ba iha krizmadu sira atu kuidadu lilin neebe iha.
“Kuida lilin nee hanesan kuida imi nia fiar, kuida imi nia moris, kuida grasa neebe Nai Maromak haraik ba imi, tanba lilin ida nee nia fatin nee bele lori ba tau iha ortoriu, fo ba familia sira bele tau iha uma, atu sira iha uma kontinua reza ba imi, atu lilin ida nee laos ahi mate atu sunu,” dehan Dom Virgilio.
Dom Virgilio dehan, lilin ida nee hanesan lilin benzidu, bele sunu iha momentu neebe sente ema hotu dook husi ita, sente iha nakukun, moris la iha sabor, sunu lilin nee atu husu Maromak leno nafatin ita, husu Maromak hatudu dalan ba ita, no lilin nia roman sinal espiritu santo neebe hamanas nafatin ita nia moris, tanba nee kuida lilin nee iha moris hanesan prezente ida neebe Nai Maromak tau iha ita nia vida.
Iha fatin hanesan, Ministru Justisa, Sergio da Costa Hornai dehan, agradese ba Bispu Dioseze Metropolitana Dili, Dom Vírgilio Cardeal do Carmo da Silva neebe bele selebra ona Eukaristia ba familia boot Prizaun Bekora.
“Agradese mos ba Amu Bispu no Amu ko-selebrante sira hamutuk ho madre no familia boot Guarda Prizional nian, familia sira husi rekuzus no mau alin sira neebe hela iha Prizaun nee nian,” dehan Ministru Justisa.
Ministru Justisa salienta, hanesan ema umanu no sarani katolika nafatin agradese ba Maromak, maske hasoru dezafiu barak-barak, maibe liu husi konviksaun nafatin hametin fiar sarani nian iha mundu nee.
Ministru Justisa dehan, hanesan ema katóliku, ita iha dezafiu barak-barak iha ita nia oin ke ita hasoru hela iha loron ba loron, maibe ita buka atu bali ita nia-aan hanesan ema neebe fiar ba kreda katólika, ba konviksaun ida ita hakarak hametin ita nia fiar.
Tuir observasaun, antes missa hahu Amu Cardeal halo uluk inaugurasaun ba iha Gruta Santo Antonio, tanba Prizaun Bekora nia mahein mak Santo Antonio.
Entretantu, iha selebrasaun nee partisipa husi krismante hamutuk nain 320 no husi prizoneiru nain 97 neebe partisipa mos husi família sira inklui Guarda Prizaun.
Tuir dadus neebe iha oras nee daudaun prizioneru iha Prizaun Bekora hamutuk 424, guarda Prizional hamutuk 165.
(ter)
