DILI, STLTIMORLESTE.com – Autoridade Inspesaun Fiskalizasaun Atividade Ekonomiku Sanitaria no Alimentar (AIFAESA) reativa hikas Restorante Pandang Bobonaro, tanba prienxe ona rekezitus.
“Ohin ami reativa fali Restorante Padang Bobonaro, tanba antes nee iha fulan kotuk ami taka atividade negosiu la lao hanesan baibain, tanba sira dapur tein ladun ijiene nunee taka proizoriu para sira bele hadia fatin,” hatete Sub Inspetora Jeral AIFAESA, Quiteria da Costa ba jornalista sira iha Hotel Timor, Tersa nee (1/07/2025).
Nia dehan, ho infrasaun sira ne’e mak AIFAESA taka fulan ida fo tempu ba nain restorante hodi hadia fatin dapur tein hahan nian, no mos fatin ema han nian nee saudavel.
Tanba nee ohin mai konsege haree dapur nain hadia inklui fatin tau hahan mos diak ona, sira prienxe kriteria ona, nunee bele reativa fali sira nia atividade negosiu hanesan baibain.
Iha fatin hanesan, Manajer Restorante Padang Bobonaro, Armando Lemos Soares hatete, atividade neebe durante nee halao loke restorante, dala ruma la ses husi falhansu ladun kontrola ijiene nian tanba AIFAESA halo inspesaun nota katak iha rekezitus balun neebe seidauk prienxe kondisaun la tuir standar AIFAESA nia.
“Sira mai taka provizoriu atu nunee ami bele hadia kondisaun nee tuir rekezitus AIFAESA nia neebe estadu hatur tiha ona, ami taka restorante fulan ida no ohin sira loke fila fali, tanba hadia tuir rekezitus neebé fo,” dehan nian.
Nia dehan, restorante nee taka iha fulan Junhu 2025 no ohin sira mai reativa fila fali, tanba haree kondisaun neebe notifika fulan kotuk ba konsege hadia tuir notifikasaun neebe iha nunee ohin reativa fali, tanba nee aban hahu loke ba publiku.
Nia haktuir, taka restorante afeita ba ekonomia laos ba nain deit, maibe ba mos staf servisu iha fatin nee durante fulan ida laiha rendimentu maibe laiha buat ida.
“Maibe ami koopera tanba presiza hadia kondisaun, nuudar sidadaun presiza koopera ho governu para bele hadia,” dehan nian.
Entretantu staf neebe servisu iha restaurante nee hamutuk nain 7, salariu tuir standar governu nia.
Tenke mantein kondisaun, ida nee ita tenke hadia diak, tanba ita hakarak ka lakohi TL Adezaun ba ASEAN, tan nee labele ses husi kondisaun sira, presiza hadia, tanba nee konkorda regra saida mak AIFAESA aplika,” dehan nian.
(joa)
