DILI, STLTIMORLESTE.com – Polisia Nasionál Timor Leste (PNTL) liu husi Diresaun Tranzitu Seguransa Rodaviariu Nasional (DTSRN) hahu husi fulan Junhu rejistu kazu asidente hamutuk 181, husi numeru nee iha nain 40 mak lakon vida.
Nia dehan, PNTL liu husi DTSRN iha munisípiu 14 husi 01 Junhu too 31 Junhu rejista kazu 181 iha territóriu Timor Leste (TL).
“Husi kazu 181 nee ema lakon vida hamutuk nain 40, kanek todan hamutuk 35, kanek kmaan 193, husi kazu hirak nee DTSRN rekapitula ba kazu nee hotu ba prosesu final mak kazu 2, prosesu ba iha Tribunal kazu 10, no sei iha prosesu nia laran mak 102, rezolve anivel infratores hamutuk 67,” hatete Diretor Diresaun Tranzitu Seguransa Rodaviariu (DTSRN), Superintendente Asistente Polisia, Luís da Costa ba jornalista sira iha salaun DTSRN, Tersa (08/07/2025).
Nia esplika, haree estatistiku nivel ba kazu nee kontribuisaun mak husi fatór ema nee mak 100%, fator veikulu no dalan laiha.
Nia informa, asindente neebe hahu husi Janeiru too Junhu DTSR rejista totál hamutuk 562 no husi 562 nee ema lakon 22, kanek todan 86, kanek kmaan 591, husi kazu hirak nee hahu husi Janeiru too mai Junhu kazu final 6 prosesu ba iha Tribunál hamutuk 19, sei iha prosesu nia laran mak 306, rezolve anivel infratores hamutuk 231.
“Husi Janeiru mai too Junhu kazu sira neebe ami rejista total 562, husi 562 nee fator umanu mak aas 90%, tuir mak fatór veikulu 10%, no mos fatór dalan 5%,” nia deklara.
Antes nee iha fatin ketak, sasin Alberico da Costa dehan, akontesimentu asidente nee tanba kareta Hilux ho volisidade neebe makaas husi Lospalos no kareta Triton soke malu tanba sira la kontrola.
“Ami nia primu Junito Mendes lakon vida tanba kareta nia tur nee hanehan kedas nia ulun nomos ulun rahun, maibe iha momentu neeba primu nee sei moris, maibe distansia neebe dook husi hospital no kareta ambulasia mos la too, primu hiit liman too iis laiha,” nia informa.
Nia afirma, iha kareta Hilux nee nia laran ida mak matebian Junito Mendes ho kareta nain kanek kmaan, kareta ida seluk nee ema nain 4, maibe ida seluk nee mos la oras mate no nain 3 kanek todan.
(jen)
