BAUKAU, STLTIMORLESTE.com – Hali huun ida tohar iha area Teulale Vila Antiga, Postu Administrativu Baukau Vila, rezulta uma ida hetan estragus, sidadaun nain 4 hetan kanek inklui taka estrada diresaun Lautem-Baukau.
Komadante Autoridade Protesaun Sivil Munisipiu Baukau, Francisco Viana Freitas informa, insidente refere akontese iha loron 08 Julhu, pur-volta tuku 01:00 meudia, iha neebe mosu anin boot rezulta hali huun ida tohar iha area Teulale Vila Antiga, Postu Administrativu Baukau Vila, rezulta uma ida hetan estragus total no aihun refere hanehan sidadaun nain 4 hetan kanek, tanba aihun refere nia sanak baku kona.
“Ita seidauk hatene feto hira mane hira, tanba ita iha hela fatin, hau seidauk konfirma, maibe informasaun husi hau nia kolega sira, nain 4 kanek nee lori tiha ona ba hospital, todan ga kmaan iha tiha ona hospital,” hateten Francisco ba jornalista sira iha fatin akontesimentu, Tersa (08/07/2025).
Nia sublina, kona-ba sidadaun nain 4 refere hetan kanek iha insidente nee lao ain ou ho transporte mak ai refere nia sanak baku kona too hetan kanek, nia parte seidauk hatene.
Nunee mos uma ida neebe hetan estragus total, parte ekipa husi Autoridade Protesaun Sivil seidauk halo identifikasaun, tanba ai hun refere nia sanak sei hanehan hela, maibe sei halo identifikasaun bainhira ai sanak sira tesi hotu ona.
Enkuantu insidente nee mos impede movimentu transporte publiku no privadu diresaun Lautem-Baukau inklui husi Postu Administrativu Baguia, Laga, Kelikai, Matebian no husi Postu Administrativu Kelikai Antigu ba Baukau Vila, tanba aihun refere taka tomak estrada publiku.
“Automatikamente ita tenke esforsu para neutraliza dalan nee hodi movimentu bele lao,” Francisco akresenta.
Liga asuntu nee, sidadaun nain 4 neebe hetan kanek iha insidente refere STL tenta konfirma parte mediku sira iha sala emerjensia Hospital Rejional Eduardu Ximenes Baukau, maibe la fo komentariu, tanba pasiente nain 4 neebe hetan kanek kmaan fo alta ona.
Entretantu daudaun parte Ekipa Bombeiru Munisipiu Baukau iha ona fatin akontesimentu hodi tesi aihun refere ho motosere, nunee bele fasilita hikas movimentu transporte publiku.
(tom)
