DILI, STLTIMORLESTE.com – Primeiru Ministru Kay Rala Xanana Gusmão relata atividade IX Governu Konstitusional ba Prezidente Republika Jose RamosHorta, aleinde PM mos informa katak sei halo konsulta publiku kona-ba ekonomia azul.
Primeiru Ministru Kay Rala Xanana Gusmão hatoo lia hirak nee ba jornalista sira bainhira remata halo enkontru ho Prezidente Republika Jose Ramos Horta iha palasiu Prezidensial Nikolao Lobato, Bairo Pite, Tersa (08/07/2025).
“Informa mos ba Prezidente iha Konselhu Ministru ami diskute ona kona-ba planu de asaun ba ekonomia azul, planu programa ami aprova tiha agora iha hela Ministru sira para fo mos hanoin ikus fali mai kuandu ami hetan tiha ona ami sei halo konsulta publika, ba imi no ba intelektual joven sira, konsulta publiku para hotu-hotu hatene saida mak nee, buat nee diak ka lae? Ba futuru oinsa,” dehan PM Xanana.
Primeiru Ministru dehan, depois konsulta publiku tiha mak sei halo, temi karik dehan lao ba komunidade sira neebe besik tasi no dook husi tasi mos hodi fo hatene.
“Buat ida mudansa klimatika estraga fatin oin-oin deit, loron ida ahi han rai, semana ida mai udan bee lori uma hotu, ida nee mudansa klimatika, ita nia sorte rai kiik ida, maibe ita nia problema mak la udan la udan sosa deit foos ona, maibe kuandu udan mos kria problema barak,” katak PM Xanana.
Primeiru Ministru hatete, atividade no planu Governu sira mak informa ba Xefe Estadu, aleinde nee informa mos ba Prezidente katak kuarta loraik Primeiru Ministru sei ba Suai no Fohorem hodi haree Estrada neebe aat.
“Informa mos ba Prezidente katak aban hau ba Suai no Fohorem, Fatumea, haree estrada sira nee tanba iha fulan Agostu nee iha ona komite revizaun orsamentu atu haree lo-loos osan ba saida nee mak hatene buat sira nee hotu mak ita temi ida nee prioridade, ida nee bele tinan seluk fali lae ita nunee hela deit la hatene gasta osan estadu nia, “ katak PM Xanana.
Aleinde nee informa mos ba Prezidente katak iha dia 4 Agostu no 20 de Agostu Primeiru Ministru sei la lao tun sae, maibe iha deit finansas hodi haree servisu membru Governu sira nia foti osan barak demais la hatene gasta hasai.
“Neebe ita kurizi malu, hadia malu, ezji ba malu responsabilidade aziji ba malu halo ho diak, hau informa ba Prezidente aban ami diskute lei ida kria IP-EP fila fali ba antigu neebe tenke tau matan hodi haree lae osan ita gasta arbiru buat hotu la lao,” katak PM.
Xefe Governu mos informa ba Prezidente katak iha Domingu Xefe Governu ba halo vizita ba Singapura tanba Prezidente ba tiha ona iha neeba, no Primeiru Ministru Singapura husu Primeiru Ministru TL ba halo vizita ofisial.
“Depois hau fila fali nia mos sei ba Guine Bisau CPLP nia dehan katak iha CPLP nia laran mos problema ida estadu de direitu demokratika nee mos nunee hela neebe ita la aat liu la diak liu, maibe mos la aat liu, idak-idak infrenta ninia difikuldade, idak-idak enfrenta problema, mais ita buka took ita lao ba oin importante mak pas no estabilidade,” katak PM Xanana.
Xefe Governu hatete lao neineik lao ba oin, laos lao diak, halo sala barak maibe kompara ho rai seluk Timor mos laos aat liu sira.
Aleinde nee Prezidente Republika Jose Ramos Horta mos kongratula IX Governu neebe atinji ona tinan 2 iha dia 1 Julhu iha dezenvolvimentu barak maibe husu atu halo mos remodelasaun ba membru Governu neebe mak servisu la lao oinsa PM nia haree ba ida nee? Hatan ba kestaun nee Primeiru Ministru laiha resposta no hatan deit katak aban mak nia ba koalia.
(eme)
