BAUKAU, STLTIMORLESTE.com – Autoridade Suku Laisorulai de Baixo iha Postu Administrativu Matebian, Munispiu Baukau, husu Governu aumenta orsamentu husi Programa Nasional Dezenvolvimentu Suku (PNDS) kada tinan neebe aloka ba Suku.
Xefe Suku Laisorulai de Baixo, Julio Farkhus Pinto esplika, orsamentu husi Programa Nasional Dezenvolvimentu Suku tinan 2025 ba Suku Laisorulai de Baixo hamutuk rihun US$ 50 neebe Autoridade Suku sei utiliza halo reabilitasaun estrada rural husi area Liuraga too Laisorulai Lemamutu ho distansia kilometru rua resin, tanba durante nee difikulta movimentasaun komunidade sira ho transporte publiku no privadu.
Prosesu preparasaun ba faze implementa reabilita estrada rural nee daudaun sei prepara ba faze koutasaun no bainhira remata hahu ona implementasaun ho tipu cor, ateru inklui konstrui barajen neebe garante sei fasilita movimentu komunidade sira ho transporte.
“Volume nee mak prezisa aumenta, ida halo reabilita nee serteza fo fasilitasaun ba komunidade lori sira nia produtu lokal,” hateten Farkhus ba jornalista STL iha Laisorulai, Segunda (14/07/2025).
Nia sublina, orsamentu PNDS tinan 2025 neebe Autoridade Suku sei utiliza halo reabilitasaun ba estrada rural husi area Liuraga too Laisorulai Lemamutu sei fasilita komunidade sira transporta produtu lokal asesu merkadu, maibe ho volume orsamentu kiik, nunee la responde ba estrada atinji kualidade diak, tanba tuir lei orsamentu neebe alokadu too deit rihun US$ 50 responde ba estrada pur volta kilometru rua resin.
Farkhus sujere, prezisa Governu Sentral halo alterasaun ba lei PNDS no krese orsamentu husi PNDS ba Suku too rihun US$ 100 hodi atinji dezenvolvimentu iha Suku ho kualidade utiliza ba tinan naruk.
“Orsamentu nee rihun US$ 100 para jere nee volume boot halo buat ruma nee kualidade i uza ba longu prazu, entaun ami ezije aumenta volume orsamentu halo alterasaun ba lei PNDS nian futuru ita bele hadia diak liu tan,” Farkhus ezije.
Liga asuntu nee, STL tenta konfirma Diretor PNDS Munisipiu Baukau maibe laiha fatin atu fo komentariu, tanba sei halao hela atividade iha fatin seluk.
Entretantu Suku Laisorulai de Baixo rejistu populasaun hamutuk 1,483 kompostu Aldeia Dara-oma, Legu, Ulsuru no Asawakasa.
(tom)
