BAUKAU, STLTIMORLESTE.com – Autoridade lokal preokupa projetu reabilitasaun estrada diresaun husi Suku Buibau ba Suku Samalari iha Postu Administrativu Baukau Vila, tanba kompanhia jere projetu rua iha fatin-fatin la hanesan.
Xefe Suku Buibau, Francisco Ximenes hateten, estrada rural husi area Ianabere too Suku Buibau no kontinua ba Suku Samalari kondisaun aat, nunee iha tinan 2024 Governu liu husi Ministeriu Obras Publikas iha tinan 2024 kontratu kompanhia lokal tolu (3) hodi halo reabilitasaun estrada refere ho tipu cor no sahe alkatraun ba durasaun servisu tinan ida neebe tuir kontratu sei remata iha fulan Dezembru tinan nee, maibe sei refere la finaliza tuir data kontratu neebe determina ona, tanba deskonfia parte kompanhia sira responsabiliza projetu iha fatin rua neebe implika ba projetu reabilita estrada refere.
“Kompanhia sira nee Governu fo kontratu iha fatin rua ga fatin tolu, dala ruma ami ezije mak sira mai no sira nia tekniku nee mos la akompanha, ida nee mak problema,” hateten Francisco ba jornalista STL iha Buibau, Segunda (14/07/2025).
Nia sublina, kompanhia tolu neebe Governu kontratu kada kompanhia responsabiliza ba kilometru rua, maibe kompanhia neebe responsabiliza iha pakote primeiru hatudu progresu diak, enkuantu kompanhia rua seluk neebe responsabiliza ba kilometru haat seidauk iha progresu.
Nia fundamenta, hanesan autoridade lokal preokupa ho progresu projetu refere, tanba nee kontinua halo kontaktu ho Servisu Munisipal Obras Publikas Baukau hodi koordena kompanhia sira aselera projetu refere.
“Hau haree kompanhia sira nee sei la hotu tuir prazu neebe determina, maibe hau nia esforsu nafatin kontaktu ho Obras Publikas obriga sira projetu nee hotu tuir prazu neebe Governu fo,” Franscisco katak.
Koordenador Tekniku Obras Publikas Destakadu Munisipiu Baukau, Diego Cipriano Caleza esplika, projetu reabilita estrada rural iha area Juridiku Suku Buibau responsabiliza husi kompanhia lokal tolu mak hanesan pakote primeiru responsabiliza husi kompanhia Nenov N5 Unipesoal Lda progresu fiziku foin atinji 19%, Levobalega Unipesoal Lda fiziku 22% enkuantu kompanhia Mexa Unipesoal Lda atinji progresu fiziku foin atinji 8%.
“Projetu nee konsidera tarde oituan, maibe ida nee mak kapasidade empreza lokal kuaze akontese iha Munisipiu hotu, maibe buat ida difikulta mak material lokal menus,” hateten Diego.
Tuir Koordenador nee katak, projetu reabilita estrada rural iha Suku Buibau lao tarde, tanba material lokal liu liu fatuk neebe durante nee parte kompanhia sira garante deit iha mota samalari, maibe dadaun nee volume fatuk iha mota samalari menus hodi difikulta tebes parte kompanhia atu aselera projetu refere.
Nia sublina, difikuldade seluk neebe parte kompanhia infrenta hodi hatarde projetu refere mak finanseiru, tanba parte kompanhia seidauk hetan pagamentu primejru, maibe tempu badak, parte Obras Publikas Munisipiu Baukau sei konvoka enkontru ho kompanhia sira hodi relata progresu fiziku ba fim tinan 2025.
“Ita nia tarjetu teknika orienta ba sira, tanba ita preve hela osan ba 2025 osan hira mak reapropria iha 2026, ida nee mak ita sei koalia ho sira,” hateten Diego.
Koordenador nee husu parte kompanhia sira atu aselera projetu refere nunee bele termina tuir orariu neebe determina.
Entertantu projetu reabilita estrada rural iha Suku Buibau nee hahu iha tinan 2024 ba kompanhia Nenov N5 Unipesoal Lda ho valor orsamentu US$ 409,205.00 Levobalega Unipesoal Lda ho valor US$ 407,603.69 no Mexa Unipesoal Lda ho valor US$ 447,615.29.
(tom)
