DILI, STLTIMORLESTE.com – Tuir informasaun mai husi informadu sira ba iha KomisaunAntiKorupsaun (KAK) konaba deskonfia dirijente balu utiliza kareta neebe mai husi doasaun ba atividade privadu, tanba nee mak ekipa husi KAK nian ba halo konfirmasaun iha Ministra Saude.
Tuir Komisariu Adjuntu Servisu Apoiu no Kooperasaun, Miguel Acasio Farria katak, tuir informasaun mai husi informadu deskonfia, tanba nee mak ekipa KAK sei buka tuir informasaun lo-loos, tanba tuir informasaun dirijente balu utiliza kareta ho matrikula privadu no iha loron feriadu fim da semana sira uza hela.
“Ami ba halo konfirmasaun laos ba halo buska, ba halo konfirmasaun kona-ba kareta neebe doasaun husi Internation Organization Migration (IOM) nee loos duni ka lae, no kareta rua neebe entrega ona ba Unidade Malnutrisaun no rua seluk seidauk muda numeru matrikula ba Estadu nian,” dehan nia ba STL iha Dili, Segunda (14/07/2025).
Nia hatutan, iha kareta haat nee kareta rua halo mudansa ona ba iha matrikula Estadu nian, maibe kareta rua seidauk, no tuir informasaun deskonfia dirijente nain rua mak utiliza hela kareta rua nee ba atividade privadu, tanba nee mak prezensa KAK nian atu ba halo konfirmasaun ho Ministra, maibe Ministra rezeita atu halo audensia, tanba nee muda fali ba iha tempu seluk.
Nia esplika, sira sei hein hodi konfirma lo-loos ho Ministra kona-ba kareta rua nee, mak foin loke investigasaun kona-ba kareta rua nee horibanhira mak simu, tanba sa mak utiliza ho matrikula privadu, no halo manutensaun uza osan estadu nian, maibe husi investigasaun mak foin hatene.
Iha fatin ketak, Akademiku UNTL, Sebastiao dos Santos dehan, KAK iha kompetensia atu halo konfirmasaun kona-ba iha situasaun balu neebe publiku kestiona.
“Hau hanoin KAK iha papel hodi halo konfirmasaun, hodi bele hatene lo-loos tanba aktu balu hanesan nee hamosu hela preokupasaun iha sosiedade nia leet,” dehan nia.
Hatutan tan, ema hotu bele halao knaar, maibe tenke halo tuir regra neebe iha, hodi hatudu ezemplu neebe diak ba iha komunidade sira.
(ter)
