DILI, STLTIMORLESTE.com – Tribunal Judisial Primeira Instansia Dili kontinua halao julgamentu hodi rona sasin kona-ba kazu iha Ministeriu Edukasaun (ME) nian.
Prosesu refere iha arguidu nain 11, antes nee Tribunal rona ona deklarasaun husi arguidu balu no mos sasin sira. Tanba nee iha julgamentu kontinuasaun iha loron Segunda nee, Tribunal deside hodi rona deklarasaun husi sasin, Marsal Amaral Lopez, momentu neeba asumi knaar hanesan Diretor Eskola Teknika Vokasional iha Maliana.
Iha sala julgamentu laran antes Tribunal atu rona dekalarasaun husi sasin, Juiz prosesu Jumiati Freitas deklara katak, prosesu ida nee atu tama ona iha faze alegasaun, tanba nee husu ba arguidu BdSF atu hatoo nia opozisaun kona-ba arguidu hakarak koalia ka lae, se arguidu hakarak koalia hodi hatoo arguidu nia deklarasaun, se arguidu hili silensiu bele informa hodi tau ba iha akta arguidu hili direitu silensiu.
Tribunal deklara, durante julgamentu arguidu la marka prezensa, por razaun servisu no viajen ba rai liur tanba nee defeza mak reprezenta, maibe arguidu iha direitu ba ultima deklarasaun antes produsaun de provas termina.
Tanba nee Tribunal fo prazu loron 10 atu arguidu fo nia opozisaun ikus molok prosesu nee tama ba iha faze alegasaun final, prazu ba arguidu atu deside hili direitu koalia ka nonok ba faktus neebe iha.
Rona tiha ida nee, Tribunal deside hodi kontinua rona sasin Marsal Amaral Lopez, momentu neeba asumi knaar hanesan Diretor Eskola Teknika Vokasional iha Maliana. Sasin deklara, tinan haluha ona, maibe momentu neeba simu lista prezensa kaderneta ruma neebe fornese husi Ministeriu Edukasaun no iha eskola neeba momentu nee iha estudante hamutuk nain 28.
Sasin deklara tan, lista prezensa kaderneta sira nee simu husi Ministeriu Edukasaun Nasional no kaderneta neebe imprime koresponde ba situasaun neebe iha hodi tau valor estudante sira nian. Tanba antes nee seidauk iha kaderneta, sira uza deit surat tahan mutin mak tau valor hodi fo ba estudante sira.
Sasin deklara, materia neebe hanorin ba estudante sira iha kaderneta nee nia laran, no lista prezensa kaderneta nee iha estrutura avaliasaun valor, tuir nia modura, tanba nee sasin rekonhese la iha problema ida kona-ba kaderneta nee.
Rona tiha sasin ida nee, Tribunal adia ba loron seluk hodi tama ba iha faze alegasaun.
Tuir faktu neebe arola husi Ministeriu Publiku katak, kazu nee envolve husi arguidu nain 11 no inisial BSF, AP, FMG, DC, ASP, JMGP, RHA, AFXR, LMR, MM no SS.
Arguidu hirak nee servisu iha Ministeriu Edukasaun, iha momentu V Governu Konstitusional, neebe envolve ho atividade produsaun lista prezensa kaderneta nian neebe la tuir nia regra neebe iha. No faktu nebe iha hatudu katak empreza produs deit lista prezensa kaderneta husi pajina ida to pajina 36, maibe tuir lo-loos too iha pajina 40.
Tanba ne, ikus mai lista prezensa kaderneta neebe distribui husi Ministeriu Edukasaun ba Eskola Teknika Vokasional labele utiliza tanba la tuir akordu kuantidade ba pajina nian.
Maske nunee, arguidu sira kontinua halo prosesu pagamentu ba empreza hodi fo prejuizu ba Estadu. Ho aktu arguidu sira nian, Miniseriu Publiku akuza arguidu sira BSF AP, FMG, DC, autor material ba krimi abuzu poder neebe previstu iha artigu 297.
Arguidu BSF, AP, FMG, DD, autor material ba krime partisipasaun ekonomia no negosiu neebe previstu iha artigu 299 Κodigu Penal.
Arguidu ASP, JMGP, RHA, AFXR, LMR, MM no SS, autor material ba krimi administrasaun danoza iha artigu 274.
Arguidu BSF, AP, FMG, DC, proibe atu azerse funsaun publika durante tinan 5, bazeia ba artigu 85 husi Kodigu Penal.
Audensia nee prezide husi Juiz Koletivu Joao Ribeiro, Jumiati Freitas no Jose Gonsalves, Ministeriu Publiku reprezenta husi Prokurador Rogerio Viegas, arguidu hetan asistensia legal husi Defensor Publiku nain tolu no Advogadu nain ida.
(ter)
