DILI, STLTIMORLESTE.com – Prezidente Republika (PR), José Ramos Horta sei vizita Binani Turiscai iha Komemorasaun 50 anos Aniversariu FALINTIL.
Prezidente Republika no Laureadu Nobel ba Pas, Jose Ramos Horta sei vizita Binani iha Postu Administrativu Turiscai iha fulan Agostu nee ba komemorasaun loron istoriku aniversariu Forsa Armada ba Libertasaun Nasional Timor Leste (FALINTIL) ba dala 50.
Fatin neebe hili iha signifikadu istoriku neebe klean hanesan fatin neebe respeitadu líder rezistensia no Prezidente daruak nasaun nian Nicolau Lobato lakon nia vida iha tinan 1978 durante luta hasoru okupasaun Indonezia.
Iha preparasaun ba serimonia nasional, esforsu multi-ajensia ida halao hela atu asegura fatin nee seguru no asesivel. Iha loron 15 too 16 fulan Julhu, ekipa trknika konjunta neebe kompostu husi Prezidensia Republika, Ministeriu Defeza, no Ministériu Obras Publikas halo levantamentu hodi avalia nesesidade infraestrutura no lojístika.
Nina Peregrina pontu fokal ida husi Palasiu Prezidensial konfirma, Prezidente nia kompromisu pesoal ba vizita nee, hodi afirma, iha nee kedas mak Xefe Estadu Nicolau Lobato lakon nia vida. Tanba nee, Prezidente Ramos Horta hakarak vizita fatin ida nee.
Parte sentral ida hosi preparasaun sira envolve konstrusaun hosi estrada foun ida hosi sidade Turiscai ba Osenaco-Binani, neebe jere husi Institutu ba Jestaun Ekipamentu nian (IGE-sigla portugés).
Projetu nee hakarak atu fornese asesu fasil ba partisipante sira no fasilita lojístika eventu nian no espeta sei remata antes loron 30 fulan Julgu.
Militar, neebe lidera husi Major Victor Marçal (Kodigu Superman), koordena besik ho autoridade lokal sira, veteranu sira no katuas lia-nain sira, hodi respeita lisan sagradu sira enkuantu asegura apoiu hosi komunidade.
Iha Rezidente lokal, Isabel de Jesus espresa nia agradesimentu hodi dehan, “Ami prontu atu apoia governu no oferese ami nia ai-horis balun karik presiza ba reabilitasaun estrada nian.” Katak Isabel liu husi Komunikadu neebe STL asesu Domingu (20/05/2025).
Fatin BINANI laos deit fatin ida haleu ho foho neebe aas no iha ai-laran tuan, kmook husi barulhu sidade nian ho nia dalan ain fatin neebe perigu seidauk asesu ba estrada nasional, maibe nia sai hanesan patrimoniu memoria nasional neebe simboliza sakrifísiu no lideransa iha tempu resistensia.
Komemorasaun aniversariu FALINTIL nian ba dala 50 nuudar momentu sentral ida ba Timor Leste, neebe sai nuudar omenajen ida ba sakrifísiu imensu neebe jerasaun libertasaun halo. Prezidente Horta nia prezensa iha fatin ida nee laos deit jestu lembransa nian maibe mos símbolu makaas ida ba unidade nasional, rekonsiliasaun no importansia neebe dura atu fo onra ba nasaun nia istoria difisil maibe konsege hetan vitoria iha ninia dalan ba independensia.
(eme)
