DILI, STLTIMORLESTE.com – Durante tinan barak nia laran komunidade neebe hela iha Zulo Knua, Suku Zulo, Postu Administrativu Zumalai, Munisipiu Kovalima, kontinua konsumu bee posu.
Justina Cardoso nuudar komunidade Suku Zulo, Aldeia Lale ba jornalista STL liu husi telefone, Domingu nee (20/07/2025).
“Dezde tempu Indonezia mai too ohin loron ami komunidade neebe mak hela iha Zulo Knua nee konsumu deit bee posu, maske iha tinan 2020 dada ona bee mai ami, maibe ami uza deit tinan rua ho balun bee nee la sai, bee torneira nee momentu dada husi Lepo mak mai ami nia knua, maibe bee nee rasik dezde iha fulan Junhu 2023 too agora ami la asesu ona bee torneira nee, no ami kontinua uza fali bee posu neebe ami uza deit bidon,” dehan nia.
Justina hatutan, bee posu nee kleur ona, uluk tempu Indonezia ninia nee ami uza deit bee posu boot tolu, nee mak bee posu ida iha lale, Pubul no ida seluk iha baze, maibe agora bee posu boot tolu nee ladun uza ona, maibe komunidade balun neebe hela besik nee sei kontinua uza nafatin, maibe daudaun nee sira uza deit bee posu tolu neebe mak besik sira nian hela fatin.
“Agora bee posu tolu nee nakonu, ami la hadau malu bee hanesan uluk, tanba uluk hadau malu bee iha tempu kalan, bee posu nee ami uza ba tein, haris, fase ropa no hemu, bee posu nee mos no malirin los,” katak nia.
Nunee mos Marito Barros hanesan lia nain iha Suku Zulo hatete, sira laos foin konsumu bee posu, maibe tinan barak ona komunidade neebe hela iha Knua Zulo nee uluk kedas, bee torneira nee kleur ona la sai ida, uluk bee torneira sei sai sira uza deit mangera mak liga ba sira idak-idak nian uma.
“Ami laos foin konsumu bee posu, maibe tinan barak ona komunidade neebe hela iha Knua Zulo nee uluk kedas, bee torneira nee kleur ona la sai ida, uluk bee torneira sei sai sira uza deit mangera mak liga ba sira idak-idak nian uma,” nia esplika.
Marito dehan, komunidade neebe hela iha zulo Knua nee aldeia haat mak hanesan Aldeia Lale, Zulo tas, Leogol no Obuk mil, maibe balun hela iha Zumalai Vila no balun deit mak hela iha Zulo Knua.
(jac)
