BAUKAU, STLTIMORLESTE.com – Xefe familia 6 iha Suku Werumata, Postu Administrativu Laga, Munisipiu Baukau, lakon hela fatin no sasan hafoin afeta husi insendiu.
Komadante Autoridade Protesaun Sivil, Francisco Viana Freitas esplika, insendiu refere akontese iha loron 20 Julhu 2025, iha neebe ho intensivu anin makaas no derepende ahi husi nu’u hun-ida hafoin alastra ba uma hela fatin 3 refere hodi rezulta sasan sira iha uma laran la konsege salva, tanba mutuk total.
“Uma laran nee ita konta sasan dapur, roupa, hare; batar, buat sira neebe iha uma laran la salvasaun, mutuk hotu,” hatete Francisco ba jornalista sira iha Vila Nova, Baukau, Segunda (21/07/2025).
Nia sublina, husi uma hela fatin 3 refere xefe familia 6 lakon hela fatin no sasan, maibe ekipa Autoridade Protesaun Sivil Baukau verifika ona dadus hodi fo apoiu emerjensia ba vitima sira.
Nia fundamenta, insendiu refere parte Autoridade Protesaun Sivil Baukau konsidera hanesan milagre, tanba mosu ahi lakan derepende no hatene husi area neebe, maibe derepende husi nu’u hun-ida nia leten afeta ba uma tolu refere.
“Komunidade rasik mos la.hatene, bele mosu fali husi nu’u leten daet mai uma, laiha ema ida iha neeba sunu duut,” Francisco katak.
Komadante Autoridade Protesaun Sivil Baukau nee akresenta, tuir informasaun neebe iha, uma 3 refere afeta ba insendiu parte vitima rekonhese laiha komunidade ida iha area Werumata sunu rai, maibe derepente ahi mosu husi nu’u hun ida hafoin ho intensivu anin makaas lori alastra ba uma 3 refere.
Tanba nee Autoridade Protesaun Sivil Baukau rekomenda ba Autoridade Suku Werumata atu koordena ho Autoridade Seguransa sira halo investigasaun ba kazu refere.
Enkuantu Xefe Suku Werumata, Sabino Martins hateten, kauza husi insendiu refere parte Autoridade Suku no vitima sira mos la hatene, tanba vitima balun sai husi uma halao atividade seluk no balun hela iha uma maibe la hatene motivu, tanba derepente ahi lakan too ona iha uma kakuluk hafoin komunidade sira haree tenta atu salva uma no sasan maibe la biban, tanba intensivu anin makaas nunee rezulta too mutuk hafoin parte bombeiru Munisipiu Baukau too fatin.
Xefe Suku nee rekonhese insendiu nee hanesan milagre, nunee sei halo koordenasaun ho Autoridade Seguransa sira halo investigasaun ba kazu refere.
“Ami tenke buka tuir ahi nee husi neebe, ami hakarak buka tuir, hakarak hatene tuir preve ida nee,” katak Sabino Martins.
Autoridade Suku nee hateten, husi insendiu nee parte seguransa Polisia Eskuadra Postu Laga mos too kedas fatin akontesimentu no foti sidadaun prienxe deklarasaun nuudar sasin haree uluk insendiu refere.
Entretantu husi insendiu nee Xefe familia 6 ho total membru familia nain 26 lakon hela fatin no daudaun hela provizoriu ho familia vizinhu sira.
(tom)
