BAUKAU, STLTIMORLESTE.com – Armajen Sentru Lojistika Nasional (CNL – sigla português) Rejional Baukau halo ona intervensaun folin foos iha Munisipiu Baukau no Vikeke ho presu folin fos US$ 12.50 kada saka kilograma 25.
Xefe Armajen CLN Rejional Baukau, Agostinho Piedade da Silva hateten, Armajen CLN Rejional Baukau estabelese tuir padraun internasional kompleta ho ekipamentu kualidade neebe durante inisiu prosesa haree kulit ba foos no kontinua halo pakotementu hafoin halo intervensaun folin foos iha merkadu lokal sira tuir pedidu neebe aprezenta husi Autoridade Suku no Postu.
Maibe iha tinan 2023 instalasaun eletrisidade iha armajen refere avaria hodi too ohin loron la halo prosesamentu haree kulit ba foos no daudaun Armajen CLN Rejional Baukau nia funsionamentu apoiu halo intervensaun folin foos iha merkadu, tanba hetan apoiu foos husi arjamen CLN seluk.
“Foin daudaun nee iha 1.400 sakas semana kotuk transporta mai no komunidade balun sosa ona kuaze 800 sakas, agora 400 ital sakas mak sei eziste pur volta 10 tonelada,” hateten Agostinho ba jornalista sira iha knaar fatin Bahu Baukau, Sesta (25/07/2025).
Nia sublina, iha periodu nee armajen CLN Rejional Baukau hetan importasaun husi arjamen CLN Nasional hamutuk 1.400 saka neebe foos saka balun tula sai ona ba Munisipiu Vikeke hamutuk kamioneta 10 hodi halo intervensaun folin foos iha Suku Kraras, Vikeke Vila, Postu Administrativu Ossu no seluk tan.
Enkuantu foos saka seluk neebe hela iha armajen CLN Rejional Baukau faan ona ba komunidade pur volta saka 800 no saka 400 resin kontinua asegura iha armajen hodi hein ba komunidade sira neebe hakarak sosa direita iha arjamen CLN Rejional Baukau.
“Iha Baukau nee loron-loron hela deit prepara ba ita nia komunidade Tirilolo, Bahu, Buibau, Buruma, Uailili, Gariuai ate too Vemasi mos mai sosa foos iha nee,” Agostinho akresenta.
Konsumidores husi Suku Bahu, Postu Administrativu Baukau Sonia Soares hateten, durante parte CLN Rejional Baukau faan foos iha armajen rejional nia parte la hetan informasaun, tanba parte CLN la informa ba publiku, maibe hetan hafoin hamutuk ho komunidade ida ho transporte publiku ida ba tula saka iha arjamen CLN Rejional Baukau.
“Hau rona dehan CLN faan foos nee hau ba direita iha fatin CLN komunidade ida mak foti foos iha neeba, hau mos iha duni transporte laran nee mak tula sai foos iha neeba, se CLN faan foos nusa la fo informasaun ba komunidade sira nunee hatene dehan iha neeba CLN faan foos,” katak Sonia.
Konsumidores nee husu parte CLN bainhira faan foos ba komunidade sira iha nivel armajen rejional no nasional tenke fahe informasaun ba komunidade sira nunee bele hatene hodi sosa foos neebe faan, tanba durante CLN Rejional Baukau faan foos iha nivel armajen, la fahe informasaun ba komunidade sira, nunee barak la hatene hodi sosa foos refere.
Entretantu foos neebe parte CLN Rejional Baukau daudaun faan marka CLN no Emblema Nasional ho kilograma 25 kada saka husi foos rai.
(tom)
