TURKIA, STLTIMORLESTE.com – Xefe Estadu Maiór Jenerál FALINTIL – Forsa Defeza Timor Leste (F-FDTL), Jenerál Domingos Raul “Falur Rate Laek” enkontru ho Xefe Forsas Armadas Repúblika Turkia, Jenerál Metin Gurak.
Durante enkontru, omólogu Jenerál Metin Gürak hatoo agradese ba Xefe Estadu Maior Jenerál F-FDTL, Tenente Jenerál Falur Rate Laek nia prezensa iha feira ida nee, maske iha distansia jeográfika, maibe laiha distansia iha amizade neebe eziste entre Forsas Armadas Nasaun rua nee nian.
Iha fatin hanesan, Xefe Estadu Maiór Jenerál FALINTIL – Forsa Defeza Timor Leste (F-FDTL), Jenerál Domingos Raul “Falur Rate Laek” hatoo agradese bá konvite no hatoo saudasaun espesial husi Sua Exelénsia Ministru Defeza nian.
“Tanba kompromisu servisu la konsege marka prezensa, neebe delega hau hodi Reprezenta Exelénsia Ministru Defeza Contra Almirante Donaciano do Rosario Costa Gomes ‘Pedro Klamar Fuik’ iha feira ida nee,” dehan Tenente Jenerál Falur Rate Laek wainhira enkontru ho Jenerál Metin Gürak, iha Sentru Expojisaun Istambul Turky.
Aleinde ida nee parte rua mos troka hanoin kona-bá produtu defeza nian neebe aprezenta iha feira nee.
Entretantu papel importante husi peskiza nee mak inovasaun no dezenvolvimentu teknolójiku hodi hasoru dezafiu kontemporaneu sira. Nuudar enkontru kortezia ida hodi agradese konvite, dezeja susesu iha organizasaun eventu no agradese ba ospitalidade neebe oferese ba delegasaun.
Nia afirma, hein katak ba oin bele partisipa nafatin iha eventu importante sira hanesan nee.
(jen)
