BAUKAU, STLTIMORLESTE.com – Tinan 16 ona Eskola Ensinu Baziku Filial Uaitonu iha Suku Builale, Postu Administrativu Ossu, Munisipiu Vikeke, iha deit profesores nain 3.
Xefe Suku Builale, Antonio G. Monis esplika, Suku Builale iha eskola publiku kompostu Primeiru Segundu Siklu iha eskola 3 no Terseiru Siklu iha eskola 1, maibe husi eskola Primeiru Segundu Siklu 3 refere iha eskola 1 ho naran EBF Uaitonu kompostu sala 6 menus profesores, tanba iha deit profesores permanente nain 3.
“Eskola seluk nee profesores foin koloka tan mai, maizumenus profesores sufisiente ona, mais so eskola EBF Uaitonu harii iha 2009 too ohin loron profesores nain 3 deit,” hateten Antonio ba STL liu husi telefone, Sesta (25/07/2025).
Nia sublina, EBF Uaitonu harii iha tinan 2009 ho sala aprendizajen 6 kompostu primeiru anu too sestu anu ho volume estudante barak, maibe obrigatoriu profesores nain 3 deit mak kobre, tanba eskola refere la hetan kolokasaun profesores iha tinan liu ba husi Ministeriu Edukasaun.
EBF Uaitonu kompostu sala aprendizajen 6, maibe numeru profesores menus fo impaktu ba prosesu aprendizajen, tanba bainhira prosesu aprendizajen lao, estudante husi sala 3 tenke vitima, tanba laiha profesores atu fo materia.
“Hau hanoin fahe turnu, loron ida tama dala rua karik sufisiente, maibe tama dala ida hahu dadersan too meudia sira nain tolu mesak halai ba mai iha primeiru anu too sestu anu nee fo impaktu,” Antonio akresenta.
Liga asuntu nee, STL tenta konfirma Koordendor EBF Uaitonu liu husi via telefone, maibe seidauk hetan komentariu, tanba sei okupadu ho servisu seluk.
(tom)
