DILI, STLTIMORLESTE.com – Tribunal Judisial Primeira Instansia Dili liu husi despaisu ba prosesu primeiru interogatoriu, deside aplika medida Aprezentasaun Periodika ba arguidu ho inisial JS.
Arguidu submete mai iha Tribunal, depois de Tribunal halo tiha indentifikasaun ba arguidu, ikus mai Juiz turnu Jose Maria deside aplika medida Aprezentasaun Periodika ba arguidu.
Tuir defeza arguidu nian, Jose Guterres katak, Tribunal aplika medida aprezentasaun periodika ba arguidu atu aprezenta an iha Eskuadra Polisia neebe hela besik ba.
“Arguidu aprezenta aan iha Eskudra Polisia neebe hela besik ba, mensalmente,” dehan Jose ba jornalista STL iha Kaikoli Sesta nee.
Nia hatutam, Ministeriu Publiku promove arguidu mai Tribunal ho krimi omisidiu ho forma tentada, neebe previstu iha artigu 138 konjuga ho artigu 23 no 23 husi Kodigu Penal , no mos krime Arma Branka lei numeru 5/2017.
Sublina, iha alegasaun Prokurador Napoliao da Silva husu Tribunal atu aplika medida Prizaun Preventiva ba arguidu.
Enkuantu husi Defeza Jose Guterres katak, husu Tribunal atu aplika medida Aprezentasaun Periodika ba arguidu.
Tuir defeza Medida neebe Tribunal aplika adekuadu ona atu asegura investigasaun lao ba oin.
Tanba nee defeza aseita ho medida nee, sei la halo tan rekursu hasoru medida nee.
Prosesu nee, prezide husi Juiz Turnu Jose Maria, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Jose Guterres.
Tuir kronolojia katak, akontesimentu nee iha Manleu, momentu neeba mosu dezentendimentu entre vitima AT no arguidu, tanba nee ikus mai arguidu halo asaun hasoru vitima.
(ter)
