DILI, STLTIMORLESTE.com – 25 Julhu 2025, Portugal hatoo agradesimentu klean ba ospitalidade husi Timor Leste (TL) ba delegasaun tomak neebe partisipa iha eventu desportivu Comunidade dos Países de Língua Portuguesa (CPLP) ba dala XII tinan 2025, neebe halao iha sidade Dili.
Sentidu agradesimentu nee hatoo direta husi Ministra Kultura, Juventude no Desportu Portugal, Margarida Balseiro Lopes, hafoin enkontru ho Primeiru Ministru (PM), Kay Rala Xanana Gusmão iha Palasiu Governu, Sesta nee (25/07/2025).
Prezensa Ministra nee reprezenta Governu Portugal iha TL, iha okaziaun eventu jogus desportivus CPLP no mos atu partisipa iha reuniaun Ministru Kultura, Juventude no Desportu nivel CPLP iha loron Domingu semana nee.iha Dili.
“Iha oportunidade hau mos atu hasoru malu ho PM, Kay Rala Xanana Gusmão hodi agradese ba ospitalidade husi TL ba komitiva tomak CPLP nian. Hatoo karinhu espesial husi Governu Portugal ho nia povu ba Primeiru Ministru, Xanana Gusmão,” nia espresa.
Nia dehan, durante iha TL, Ministra Margarida Balseiro Lopes asiste direta jogu desportivu oin-oin iha eventu CPLP no sente kontente tanba Portugal iha avansu makaas iha jogu hirak nee liu husi vitoria barak, maibe buat neebe importante liu iha kompetisaun nee mak enkontru entre povu husi país irmaun sira, país amigu sira CPLP nian, hanesan oportunidade diak atu fortalese no aprofunda liu tan relasaun amizade neebe klean entre sira, espesialmente entre Portugal ho Timor Leste.
(jos)
