BAUKAU, STLTIMORLESTE.com – Komunidade sira husu Governu reabilita estrada husi area igreja Suku Uailili ba Aldeia Waimanuboe no Watubala, neebe oras nee difikulta movimentu transporte publiku no privadu.
Komunidade Aldeia Watubala, iha Suku Uailili, Postu Administrativu Baukau Vila, Leonito Sebastião Xavier hateten, kondisaun estrada husi area igreja Uailili ba Aldeia Waimanuboe no Watubala hamutuk kilometru (Km) 8 resin neebe durante nee komunidade sira husi Aldeia rua refere asesu, maibe difikulta movimentusaun liu-liu iha tempu udan, tanba kondisaun estrada aat.
Komunidade nee husu parte kompetente atu tau prioridade ba estrada rural liga ba Aldeia Waimanuboe no Watubala, tanba Aldeia rua refere potensial ba produtu lokal hanesan kulu, hudi, nu’u no seluk tan, maibe tempu udan difisil lori sai hodi asesu merkadu, tanba kondisaun estrada limitia transporte movimentu too area refere.
“Relasiona estrada neebe agora ami uza 8 kilometru ital neebe mak durante nee ami asesu nia kondisaun mak grave atu asesu ami nia produtu ba merkadu bainhira tempu udan susar kareta kiik labele, tanba rai kuak suvida makaas. Ami komunidade nia rekomenda ba parte kompetente fo netik prioridade ba ami nia estrada nee,” hateten Leonito ba jornalista sira iha Waimanuboe, Sabadu (26/07/2025).
Hatan ba kestaun nee, Prezidente Autoridade Munisipiu Baukau, Venderanda Lemos rekoinhese, ligasaun estrada ba Aldeia Waimanuboe kondisaun aat no grave, tanba nee presiza atu halo reabilitasaun.
“Dezde hau nia mandatu iha primeiru ano hau husu ona ba enjinheiru sira para halo levantamentu ba estrada sira, laos estrada deit, maibe eskola, Sentru Saude no Postu Saude, estrada neebe liga ba Suku sira nee mos hanesan, depois de levantamentu ami lori ba Konselhu Konsultivu Munisipal para hetan aprovasaun nunee haruka ba nasional atu kontinua ba prosesu aprovasaun nian,” katak Veneranda Lemos.
Autoridade Masima Munisipiu Baukau nee argumenta, estrada liga ba Suku sira, edifisiu eskola, Sentru Saude no Postu Saude neebe iha Munisipiu Baukau dadaun nee kondisaun aat, Autoridade Munisipal liu husi parte enjinheiru sira halo ona levantamentu hodi diskute iha reuniaun Konselhu Konsultivu Munisipal (KKM) fo aprovasaun hafoin relata ba Nasional hodi tetu liu husi planu Orsamentu Jeral Estadu 2026 nian ba Autoridade Munisipiu Baukau.
“La kleur tan Munisipiu Baukau mos programa no planu orsamentu ba Komisaun Revizaun Orsamentu (KRO) diskute projetu hira mak sei halo iha 2026, hau labele esplika lai estrada hira mak tama iha ita nia planu,” Veneranda hateten.
Autoridade Munisipal nee sublina, estrada neebe submete ba Nasional laos iha Suku Uailili deit, maibe kobre hotu estrada rural sira iha Munisipiu Baukau neebe dadaun kondisaun aat no grave.
(tom)
