VIKEKE, STLTIMORLESTE.com – Daudaun nee aimoruk antri retro viral (ARV) iha Munisípiu Vikeke sufisiente hodi fo tratamentu ba ema neebe ho moras HIV-SIDA.
“Aimoruk ARV ami rai iha fatin tratamentu ba HIV, aimoruk ami tau hotu iha neeba, kondom tau hotu iha neeba, aimoruk hepatitis aimoruk iha, sifilis aimoruk iha, HIV aimoruk iha,” hatete Ofisial Programa HIV-SIDA iha Munisípiu Vikeke, Joãojinho Viana ba jornalista sira iha Sede Suku Fatudere, Postu Administrativu Vikeke Vila, Munisípiu Vikeke, Kuarta (30/07/2025).
Nia dehan, aimoruk pesoal saude sira rai iha fatin tratamentu ba ba HIV, sira la rai iha Sentru Saude Vikeke nomos la rai iha Postu Saude sira.
“Ami la rai iha Postu Saude sira, maibe ami rai iha fatin tratamentu ba HIV nian, karik pasiente nee pozitivu HIV, ami ho konsilor lori aimoruk ba pasiente nia fatin,” nia esplika.
Nia deklara, polítika Ministeriu Saude Servisu hamutuk ho NGO lokal rua hanesan NGO esperasa no NGO Esterela, sira nia servisu mak pasiente neebe ses husi tratamentu ba moras HIV-SIDA.
“Iha fulan Janeiru too Junhu nee ita konsege lori fila atus ida resin, husi NGO nain rua nee, tanba sira buka ita nia maluk sira neebe moris ho HIV maibe lakon tratamentu, la hatene ita nia pasiente Maluro ami seidauk hasoru, maibe pasiente Fatulari ami hasoru beibeik tiha hodi fo aimoruk,” nia informa.
Nia hatutan, pasiente HIV dala barak lakohi hasoru pesoal saude sira, maibe sira kontinua buka tuir too uma no too iha tos laran.
“Sira dala ruma lakohi hasoru ita iha uma, maibe dala ruma ami hasoru iha tos laran neeba, tanba kestaun sira moe no dala ruma halai ses husi tratamentu nee dala ruma sira dook husi Sentru ARV, tanba nee ami tenke buka meus atu buka tuir too sira nia fatin hodi fo aimoruk,” nia koalia.
Iha fatin hanesan, Komunidade Evazelino Ximenes informa, aimoruk ba HIV-SIDA iha Sentru Saude laiha no Postu Saude laiha, tanba nee bele lori aimoruk nee mai iha Postu Saude atu nunee karik pasiente HIV-SIDA iha labele lao dook hodi halo tratamentu.
“Ohin ita rona ona esplikasaun husi ita nia pesoál saúde sira katak, aimoruk sufisiente iha fatin tratamentu ba HIV, no karik ema ho moras HIV lakohi ba halo tratamentu, sira lori tuir aimoruk nee too iha nia fatin, nee planu ida neebe diak tebes, tanba dala ruma ita nia maluk nee moe, sira bele lori tuir atu nunee bele hemu aimoruk rutin,” nia afirma.
(jen)
