BAUKAU, STLTIMORLESTE.com – Husi fulan Maiu too Julhu tinan nee, Autoridade Protesaun Sivil (APC) Munisipiu Baukau rejistu uma komunidade afeta ba dezastre naturais hamutuk 88.
Informasaun nee relata husi Komadante Operasaun APC Munisipiu Baukau, Francisco Viana Freitas ba jornalista sira iha knaar fatin, Tirilolo Baukau, Segunda (04/08/2025).
“Liga dezastre naturais iha Munisipiu Baukau husi fulan Maiu Junhu Julhu ami rejista dadus hamutuk 88 mak ami relata, dadus 88 nee insendiu mak hamutuk 29, restu nee anin mak sobu,” nia informa.
Komadante nee esplika, uma komunidade 88 neebe afeta ba dezastre naturais kompostu tipu rua, uma 29 afeta husi insendiu no restu sobu husi anin ho kategoria kaman no natoon.
Nia sublina, husi numeru vitima dezastre naturais refere parte Autoridade Protesaun Sivil Munisipiu Baukau fo hotu ona apoiu emerjensia no halo ona verifikasaun, maibe sei hein faze tuir mai ba re-verifikasaun, nunee bele hatene kategoria estragus molok apoiu material rekuperasaun.
“Ita sei hein fali re-verifikasaun anivel nasional depois mak ita hatene kategoria estragus total, natoon no kamaan, hein re-verifikasaun mak ita hatene,” Franscisco akresenta.
Komadante APC Munisipiu Baukau seidauk bele informa data tentativa ba re-verifikasaun anivel nasional, tanba nee planu Nasional, maibe bainhira programa re-verifikasaun anivel nasional hahu ona too iha Baukau parte APC Munisipiu Baukau sei akompanha hodi identifika hikas ba vitima sira nunee bele hetan direitu apoiu material rekuperasaun.
Aliende mos nia informa, durante rejistu uma komunidade 88 hetan estragus husi dezastre naturais la rezulta sidadaun ruma lakon vida no kanek. Maibe APC kontinua apela ba komunidade sira hotu neebe hela iha fatin risku sira hanesan halo uma hela fatin iha foho lolon, tasi ibun no mota ninin atu muda hela fatin husi fatin risku refere, tanba dezastre naturais mosu la tuir tempu.
“Ami halo ona sosializasaun ba Suku sira, depende fila fali ba sira nia Autoridade, tenke muda sai ga ou hela nafatin, se hela nafatin automatikamente vida no sasan ameasadu, maibe diak liu buka meus ses husi fatin neebe risku ba ita nia vida,” katak Francisco Viana.
Autoridade Prontesaun Sivil Munisipiu Baukau kontinua husu ba komunidade sira neebe hela iha area risku sira, hanesan hela iha foho lolon, tasi ibun no mota ninin atu buka fatin neebe seguru nunee bainhira dezastre naturais akotense la prejudika ba vida no sasan sira seluk neebe iha.
(tom)
