DILI, STLTIMORLESTE.com – Komando FALINTIL-Forsa Defeza Timor Leste (F-FDTL) hamutuk ho funsionáriu Ministériu Defeza Segunda feira (04/08/2025) hasae Bandeira Nasionál inísiu fulan Agostu nian iha resintu Quartel General no Ministériu Defeza Fatuhada, Dili.
Xefe Estado Maior General Forsas Armadas(CEMGFA) Tenente General Domingos Raúl “Falur Rate Laek” husu ba militár hotu no mos funsionariu Ministériu Defeza nian atu nafatin servisu ho fuan no enerjia hodi marka ita nia prezensa espíritu nasionalizmu nian hodi prepara ba komemorasaun loron kriasaun FALINTIL nian neebe sei monu iha 20 Agostu tinan nee.
“Hau hakarak hatete ba ita hotu atu servisu ho fuan no enerjia hodi marka ita nia prezensa espíritu nasionalizmu, tanba fulan ida nee nakonu ho aktiviadade sira barak liu-liu konaba preparasaun serimónia 50 Anos kriasaun FALINTIL atividades barak mak ita halo hanesan aktividade sosiais no kulturais, parada militár, Cimic, Desportivas, laos ita deit mak halo, ita konvida mós ita nia entidades Internasionál barak atu mai partisipa testamuña ba ita nia data históriku ida nee,” hateten CEMGFA Falur Rate Laek iha dikursus serimónia hasae Bandeira Inísiu fulan Agostu iha Quartel General Fatuhada, Dili, Segunda nee (04/08/2025).
Xefe Estadu Maior Jenerál nee husu ba militár hotu husi Prasas too Ofisiais sira inklui mos Diretor sira husi Ministeriu Defeza nian no mos funsionariu sira hotu atu halo preparasaun masimu ho vontade no enerjia tomak hodi hein ba komemora loron historiku nee.
“Ita tenke esforsu aan ita buka atu Re-Infrenta situasaun sira nee resolve ho esforsu ho energia ho kbiit ho prezensa espíritu atu evita fallansu, husu ita hotu kuidadu saude no ita nia aan preokupa ho ita nian responsabilidade institusional nee mak importante liu fo komfiansa ba malu esforsu aan servisu hamutuk atu nune’e ita nia atividade neebe ita halo tenke ho susesu,” nia afirma.
(jen)
