BAUKAU, STLTIMORLESTE.com – Delegasaun Teritorial Florestal Kafe Plantas no Industria (DTFKPI) Baukau prende motosera 5 no kilat manu 6, maibe ai-kameli kontinua lakon, tanba kauza husi menus rekursu.
Xefe Departamentu Delegasaun Territorial Florestal Kafe Plantas no Industria Baukau, António José Lopes esplika, husi fulan Janeiru too Julhu tinan nee, Delegasaun Territorial Florestal Kafe Plantas no Industria Baukau liu husi patrolhu rutina husi Korpu Guarda Florestal konsege prende motosera unidade 5, tanba tesi sein autorizasaun no tesi ai protejidu, aleinde nee mos prende kilat manu unidade 6 husi komunidade sira neebe tenta kasa iha ai-laran.
Motosera unidade 5 refere prende iha area Postu Administrativu Baukau Vila, Kelikai inklui iha Postu Administrativu Venilale, maibe motosera unidade 3 entrega hikas ona ba nain hafoin kumpri ona dever iha nasional, enkuantu unidade 2 kontinua asegura iha edifisiu Baukau, tanba nain seidauk kumpri dever.
Enkuantu kilat manu unidade 6 prende iha Postu Administrativu Vemasi, Baukau Vila no Postu Baguia neebe dadaun sei asegura iha edifisiu, maibe sei entrega ba Ministeriu kompetente hodi halo distruisaun, tanba laiha lei atu prosesa utilizador sira.
Aleinde mos husi fulan Janeiru too Julhu tinan nee rejistu keixa hamutuk 10 resin husi aikameli sira neebe lakon iha Munisipiu Baukau.
“Ai kamali neebe ema deskonhesidu estraga no naok iha fatin barak, keixa neebe tama 10 resin husi Kelikai, Venilale nomos Baukau Vila, aikameli neebe tuan ona sira tesi lori lakon, maibe haree ida neebe seidauk tuan sira husik hela deit. No ida foin lalais foti iha Triloka nee hamutuk tonelada ida resin,” hateten António ba jornalista sira iha knaar fatin Vila Nova Baukau, Tersa (05/08/2025).
Nia sublina, husi fulan Janeiru too Julhu tinan nee mos Delegasaun Territorial Florestal Kafe Plantas no Industria Baukau simu keixa hamutuk 10 resin husi Autoridade Suku sira iha Postu Administrativu Baukau Vila, Vemasi inklui Kelikai kona-ba ema deskonhesidu naok aikameli. Husi keixa neebe iha aikameli balun ema deskonhesidu lori lakon no balun la konsege foti no dadaun asegura iha edifisiu Delegasaun Territorial Florestal Kafe Plantas no Industria Baukau.
Aleinde mos husi fulan Janeiru too Julhu tinan nee, Delegasaun Territorial Florestal Kafe Plantas no Industria Baukau servisu hamutuk ho Komando Polisia Munisipiu Baukau prende aikameli tonelada ida resin iha Suku Triloka, Postu Baukau Vila no evidensia dadaun asegura iha Ministeriu Publiku.
Nia fundamenta, relasiona aikameli neebe kontinua lakon iha Munisipiu Baukau, tanba kestaun menus rekursu umanus falta fasilidade servisu membru Guarda Florestal sira utiliza patrolhu iha tempu kalan.
“Iha Munisipiu ida ita koalia kona-ba Guarda nee iha Postu ida mak ema ida nee susar, tanba komunidade barak Jeografikamente mos luan labele kobre, ema naok aikameli iha kalan sira mos laiha transporte, tempu ameasa tebes ba sira ho deit farda oan nee kuitadu kalan ba atua oinsa, neebe kalan nee ami hetan asegura husi Polisia mak ami lao se laiha ami la brani lao,” António akresenta.
Xefe Departamentu Delegasaun Territorial Florestal Kafe Plantas no Industria Baukau, António José Lopes informa, Jeografikamente Munisipiu Baukau area luan ho total populasaun barak, nunee halo patrolhu labele kobre hodi deskobre ema deskonhesidu sira naok aikameli iha tempu kalan, tanba Korpu Guarda Florestal menus ekipamentu no menus rekursu umanus atu patrolhu rutina iha tempu kalan.
Preokupasaun refere relata ona ba Nasional, maibe seidauk iha resposta, tanba nee kontinua husu Governu aumenta numeru rekursu umanus no apoiu ekipamentu sufisiente hodi apoiu liu tan patrolhu membru Guarda Florestal sira iha tempu kalan, tanba durante nee membru Guarda Florestal sira patrolhu iha tempu kalan hetan apoiu husi Komando Polisia Munisipiu Baukau.
Entretantu Delegasaun Territorial Florestal Kafe Plantas no Industria Baukau iha Korpu Guarda Florestal hamutuk nain 19 neebe dadaun destaka ona iha nivel Postu Administrativu sira hotu.
(tom)
