BAUKAU, STLTIMORLESTE.com – Programa melhoramentu bee moos ba populasaun sira iha area urbana iha Munisipiu Baukau hetan kansela iha nasional.
Koordenadora Bee Timor-Leste Empreza Publiku (BTL,EP) Munisipiu Baukau, Adriana da Roza Belo esplika, uma kain sira neebe eziste iha area urbana Baukau Vila seidauk asesu bee moos husi kanalizasaun BTL hamutuk rihun 3 resin, kompostu Suku Buruma sorin, Kaibada sorin, Bahu sorin, Buibau sorin, inklui Tirilolo sorin, tanba BTL seidauk iha melhoramentu iha sistema bee moos.
Nunee BTL, EP Munisipiu Baukau iha tinan 2022 aprezenta planu melhoramentu sistema bee moos iha area urbana Baukau Vila liu husi BTL, EP Nasional ba Governu, maibe programa refere kanseladu.
“Pedidu nee aprezentasaun iha tinan 2022 atu implementa fiziku, maibe orsamentu nee kansela tiha husi lideransa sira, ita la hatene nee tanba saida. Ida nee hau la hatene, Ministeriu ga ou Primeiru Ministru, tanba nee nivel altu, tanba nee mega projetu” hateten Adriana ba STL liu husi telefone, Tersa (05/08/2025).
Nia sublina, BTL, EP tutela iha Ministeriu Obras Publikas, maibe programa melhoramentu sistema bee moos ba komunidade sira iha area urbana Baukau Vila, Munisipiu Baukau, kansela husi parte neebe nia parte seidauk hatene klean, maibe iha mandatu Nonu Governu Konstitusional kansela, tanba programa melhoramentu sistema bee moos iha Baukau nuudar mega projetu.
Nia fundamenta, programa refere kanseladu afeta direita ba komunidade sira, tanba durante nee komunidade sira halerik ba bee moos, nunee BTL esforsu hodi responde komunidade sira nia preokupasaun, maibe seidauk iha rezultadu, tanba programa kanseladu.
“Ita fatin husu ba iha parte relevante sira para halo dezisaun ba ida nee,” Adriana akresenta
Koordenadora BTL, EP Munisipiu Baukau nee argumentu, mezmu programa refere hetan kansela iha nasional, maibe nafatin esforsu liu husi koordenasaun parte BTL nasional no Ministeriu kompetente hodi solusiona asuntu refere.
Xefe Suku Tirilolo Postu Administrativu Baukau Vila, Elvino Belo apresia ho planu BTL neebe hakarak halo melhoramentu sistema bee moos iha area urbana Baukau Vila, tanba komunidade sira iha Suku Tirilolo barak seidauk asesu bee moos husi kanalizasaun BTL,EP, nunee tinan barak komunidade sira tenke sosa bee moos husi transporte bombeiru privadu sira hafoin utiliza ba nesesidade diaria, tanba nee husi planu BTL diak atu responde komunidade sira nia preokupasaun, maibe triste, tanba novidades Governu kansela programa refere.
“Primeiru hau sente triste, tanba bee moos, saude no edukasaun mak importante ba ita, loloos ida nee labele kansela, maibe Governu nia politika oinsa mak kansela ita labele hatene ita labele too iha neeba,” katak Elvino.
Xefe Suku Tirilolo nee husu Governu no BTL,EP diak liu melhora nafatin bee moos nunee komunidade sira bele asesu bee moos, tanba bee moos importante ba komunidade sira, maibe too ohin loron komunidade barak kontinua infrenta problema bee moos.
Entretantu iha area urbana Baukau Vila Munisipiu Baukau, BTL, EP dadaun nee rejistu klienta hamutuk 1.990 asesu ona bee moos iha kanalizasaun BTL, EP no rihun 3 resin seidauk asesu bee moos husi kanalizasaun BTL, EP.
(tom)
