AMBENO, STLTIMORLESTE.com – Vendedores Merkadu Nunbei durante nee koopera diak tebes ho governu Autoridade Rejiaun Admnistrativa espesial Oekusi-Ambeno (RAEOA) ho Sekretariu Estadu Toponomia no Organizasaun Urbana (SETOU), tanba nee fatin negosiu neebe sira harii, oras nee sira rasik voluntariamente sobu ona iha fulan hirak liu ba, maibe seidauk iha rekuperasaun husi parte governu, neebe sira husu governu atu fo ona indemnizasaun atu nunee sira bele utiliza osan nee hodi hadia sira nia fatin negosiu.
Informasaun nee hatoo husi koordenador Jestor Merkadu Nunbei, Fernando Sousa Neca liu husi dialogu ho ekipa konjuntu neebe mak organiza husi Diresaun Komersiu no Industria Oekusi, servisu hamutuk ho Teras propriedade no serbisu kadastru inklui parte Polisia iha Merkadu Nunbei, Kuarta (07/08/2025).
“Ami durante nee koopera ho governu maka sobu ona ami nia baraka ou fatin negosiu neebe durante nee ami harii iha merkadu nee hodi halo negosiu, maibe governu Timor Leste (TL) liu husi Sekretariu Estadu Toponomia no Organizasaun Urbana (SEATOU) ho Autoridade RAEOA atu hamamuk fatin nee, ami hamamuk ona, maibe ami lori ami nia sasan tau naklekar deit iha uma, ate sasan balun bele expire, tanba nee ami husu ba governu atu fo ona indimnizasaun, nunee ami bele utiliza osan nee hodi hadia ami nia fatin hodi kontinua ami nia vida negosiu,” dehan nia.
Nia haktuir tan katak, durante nee hasai ona sira nia sasan husi merkadu nee, bainhira loos maka governu harii merkadu nee no durasaun ba konstrusaun merkadu nee too tinan hira, hodi nunee negosiante sira hatene.
Hatan ba kestaun indimnizasaun, Diretor Rejional Teras Propriedade no serbisu kadastru Rejional Oekusi, Julio Coel dehan, rai nee iha funsaun sosial, tanba nee kuandu governu presiza atu halo konstrusaun ruma ba nesesidade ema barak nia diak iha futuru, governu mos iha rekoperasaun, neebe ekipa kontinua serbisu hamutuk hodi haree kestaun nee.
“Horseik iha Dialogu nee, loos duni komunidade ka vendedores sira ejiji ba governu atu fo indimnizasaun, ekipa konjuntu neebe mai husi Ministeriu Komersiu no Industria liu husi komersiu industria rejional Oekusi, obras Publiku liu husi Diretor Rejional Infraestrutura (DRI) no Sekretariu Rejional asuntu Teras Propriedade no Serbisu Kadastru, hodi fo rekoperasaun maibe ida nee sei iha diskusaun nia laran hodi haree ba kestaun nee,” dehan Diretor Rejional asuntu Teras propriedade no serbisu kadastru, Julio Coel ba STL iha ninia serbisu fatin, Kinta (07/08/2025).
Iha oportunidade nee, Diretor Rejional Komersiu no Industria Rejional Oekusi, Domingas Sufa dehan, dadus kona ba maluk negosiante sira neebe durante nee harii uma halo negosiu, balun harii uma hodi hela permanente, dadus nee iha hotu ona, maibe buat hotu-hotu tenke liu husi prosesu aprovizionamentu, tanba nee husu ba vendedores sira atu kontinua kolabora tanba direitu sei la lakon.
(jos)
