LAUTEM, STLTIMORLESTE.com – Komisariu Adjuntu Komisaun Anti Korupsaun ba Prevensaun no Sensibilizasaun, Rosario Araujo hamutuk ho ekipa Espesialista Anti Korupsaun halibur funsionariu publiku ho setor privadu 200 resin husi Munisipiu Lautem nian, hodi sensibiliza Lei Nu. 7/2020 kona-ba Medidas Prevensaun no Kombate Korupsaun, tanba sira hasoru diretamente lei nee.
Sensibilizasaun iha loron Tersa nee, realiza iha Salaun Administrasaun Munisipal Lautem no ofisialmente loke husi Sekretariu Munisipal ba Asuntu Sosiais no organizasaun munisipal Dr. Zeferino dos Santos Siqueira ho topiku, Hasae Konesimentu Ajente Publiku no Privadu Kona-ba Lei MPCC.
Komisaun Adjuntu KAK, Rosario Araujo hatoo agradesimentu ba dirijentes publiku hamutuk ho setor privadu kolabora diak ho KAK mai atende sensibilizasaun ida nee, hodi hamutuk promove boa-governasaun iha Munisipiu Lautem.
“Lori Komisariu KAK Rui nian naran hakarak hatoo obrigadu barak ita bele hasoru malu dala ida tan iha fatin ida nee iha momentu hanesan tinan hirak liu ba iha fatin nee ita koalia ho asuntu hanesan, prevene no kombate korrupsaun,” dehan Adjuntu iha nia intervensaun, iha Lautem, Tersa (12/08/2025).
Tuir nia, Korupsaun nuudar krimi neebe fo ameasa ba valores demokrasia, impede dezenvolvimentu nasional no hamate kompetisaun negosiu neebe justu hodi prejudika politika ekonomia no justisa Estadu nian dezenvolvimentu nasional hatur iha artigu 6 Konstituisaun Republika Demokratika Timor Leste, kona-ba objetivu Estadu TL nian atu promove no garante moris diak povu doben tomak.
Krimi korrupsaun sei fo influensia makas ba prosesu hari no hametin integridade instituisaun demokratiku sira atu dezempenha prestasaun neebe ho kualidade diak ba povu, maske Estadu TL halo ona esforsu oin-oin atu prevene no kombate korrupsaun.
“Esforsu hirak nee bele haree liu husi ratifikasaun Konvensaun ONU kontra korrupsaun liu husi rezolusaun Parlamentu Nasional Nu. 25/2008. Tamba nee Lei Nu. 7/2020 MPCC nudar meius ida viavel atu prevene no kombate korrupsaun,” dehan nia.
Iha fatin ketak, Akademiku UNTL, Rafael de Jesus dehan, importante duni halo sensibilizasaun ba lei refere, atu funsionariu sira bele komprende didiak.
“Hanoin importante halo sensibilizasaun ba lei refere, atu nunee Funsionariu Publiku sira bele iha konhesimentu, hodi halao servisu tuir lei haruka,” dehan nia.
(ter)
