DILI, STLTIMORLESTE.com – Polisia Nasional Timor Leste (PNTL) fo sai kona-ba metodu selesaun ba kandidatu PNTL ba 2025, sira sei fo materia 6.
Portavos Komisaun Rekrutamentu Superintendente, Antonio da Luz dehan, kona-ba métodu selesaun ba iha Kandidatu PNTL foun ba tinan 2025 nian, bazeia ba diploma ministerial numeru 17/2025 neebe iha artigu 29 no artigu 30 nomos artigu 31.
Nia tenik, PNTL fo sai prova selesaun iha metodu selesaun tuir artigu 29 hatete, iha prova oin lima, prova kultural, prova aptidaun fiziku, prova phisikolojika, intervista profisional, prova mediku, depois tuir prosesu nee hotu sei iha etapa eliminatoriu.
“Iha artigu 30 nee prova kultural nee ita nia kandidatu sira sei tuir materia 6 mak hanesan lian tetun, português, istória, georafia, matemátika no Konstitusionál RDTL,” hatete nia ba jornalista sira liu husi konferensia imprensa iha Sentru Formasaun Polisia Komoro, Dili, Tersa (12/08/2025).
Nia esplika, ba artigu 31 prova aptidaun fiziku ezersísiu sira maka fleksaun ho liman ba trave, (tara aan) ba mane, estensaun ba rai leten nee feto no mane hotu, halai minutu 12 ba mane 2200 m, ba feto 1800 m, nomos lao iha protiku leten anexo V, salta ka haksoit moru ba mane 0,90 cm ba feto 0,70 cm anexo V.
“Materia sira nee ita fo sai para kandidatu sira halo preparasaun, tanba materia sira nee mak sei sai iha ezame kultural, ami fo sai iha públiku bá hotu-hotu hatene, para ita nia kandidatu sira bele estuda hodi halo preparasaun,” nia deklara.
Iha fatin hanesan, Kandidatu PNTL foun, Aderito da Silva informa, métodu selesaun nee todan tebes, iha artigu 29 no 31 neebe todan, tanba nee tenke prepara didiak idak-idak nia aan atu sai membru PNTL, laos fasil maibe difisil tebes.
(jen)
