DILI, STLTIMORLESTE.com – Ministeriu Komersiu no Industria (MKI) liu husi aprezenta proposta Planeamentu Orsamentu Jeral Estadu (OJE) 2026 ba Komite Revizaun Orsamentu (KRO), propoin osan adisional ho montante US$ 3.4 milhões.
Nia dehan, MKI ohin mai aprezenta OJE 2026 ba KRO, ita aprezente tetu inisial mai husi Ministeriu Finansas hetan US$ 4.9 milhões kategoria ba iha salariu vensimentu ben servisu, tranferensia publika, kapital menor no kapital dezenvolvimentu ba iha salariu vensimentu ho rihun US$ 90 resin, ida nee la sufisiente selu deit ba ita ninia funsionariu sira permanente iha MKI por volta ema nain 208 kazuais nee nain 403, hamutuk 611.
Tanba orsamentu rihun US$ 90 nee atu kobre deit ba iha salariu baziku la inklui desimu terseriu, la inklui subsidiu nomos salariu reprezentasaun, tanba iha Ministriu mos deskonsentradu iha Munisipiu inklui mos reprezentasaun sira iha rai liur.
“Ami hatoo adisonal porvolta US$ 3.4 milhões para bele sustenta ba iha makina estadu nian, funsionariu sira, nunee mos iha bem servisu balun neebe aprezenta mos para bele kobre hotu ba programa pontual obra ba funsionamentu dezenvolvimentu institusional nomos investimentu diversifika ekonomiku, ami haree katak ida nee importante oinsa diversifika ekonomiku nomos kriasaun empregu,” hatete Ministru Komersiu no Industria (MKI), Filipus Nino Pereira ba jornalista sira hafoin aprezenta OJE 2026 ba KRO Ministriu Finansas, Tersa nee (12/08/2025).
Nia dehan, kapital dezenvolvimentu haree katak foku ba iha dezenvolvimentu industria masin, tanba industria masin nee presiza tebes, tanba koalia kona-ba rede negosiu sei nakloke, merkadu nakloke, investimentu nakloke iha oportunidade barak, ita bele aproveita liu-liu mak setor privadu sira.
Tanba nee dalan nakloke, oportunidade barak sei mai, oinsa matenek neebe iha bele aproveita negosiu hodi dezenvolve ita nia ekonomia, liu-liu kresimentu ekonomiku.
(joa)
