BAUKAU, STLTIMORLESTE.com – Prezidente Konselhu Munisipal Kombatentes Libertasaun Nasional (CMCLN – sigla português) Munisipiu Baukau, Cornelio Gama “L7” sei akumula veteranus hotu iha Munisipiu Baukau hodi rezolve problema veteranus.
Prezidente CMCLN Baukau eleitu nee hateten, sei haree kombatentes no veteranu sira neebe daudaun enfrenta problema, nunee labele hamosu preokupasaun no fo satisfasaun ba FALINTIL sira, tanba FALINTIL moris husi povu, maibe balun seidauk hetan rekonhesimentu.
“Ita kuandu la aplika loron kalan sira krize manifesta nafatin, neebe agora balun koalia terus durante tinan 24 maibe laiha rezultadu, entaun hau tenke akumula hotu veteranus Baukau nian halai hamutuk rezolve problema veteranus durante 24 anos ukun aan,” informa “L7” ba jornalista sira hafoin remara serimonia segundu konferensia iha salaun Sentru Konvensoens Vila Antiga Baukau, Tersa (12/08/2025).
Nia deklara, FALINTIL neebe nia prioridade atu akumula hodi rezolve problema veteranus no kombatentes iha Munisipiu Baukau mak hanesan Taur Matan Ruak, Fernando “Beredu’u” Gusmão, Costodio Belo “Alin Laek” no seluk tan neebe sei moris hodi haree hikas dadus no submete ba Governu atu tetu.
Nia sublina, veteranus no kombatentes neebe prioridade atu haree hikas nia dadus mak dadaun hetan dedikasaun eskluzivu 0a3 no 4a7, tanba ema beik no matenek kontribui hotu funu Libertasaun Nasiona, laos lisensiatura mak iha momentu neeba apoiu luta libertasaun patria.
“Hau akapta buat hotu haree hau nia soldadu sira uluk lao ho hau sei analfabetu obriga sira foti kilat liberta Nasaun, ita tenke haree sira, tanba nasaun ida la oferese hanesan arma ida,” L7 akresenta.
Nia informa, planu prioridade seluk mak rezolve restu mortais saudozu Vicente Reis “Sahe” nian neebe tinan barak ona rai deit iha uma familia saudozu nian, iha Suku Bukoli, Postu Administrativu Baukau Vila.
“Primeiru ita atu haree saudozu sira hanesan Sahe neebe seidauk haloot no sede ba kada postu sira ita tenke lori ba Estadu haree, keta halo kapaseti kilat balun rai hela karik tau iha neeba para haree koalia kona-ba istoria husi 1975 too 1999,” hateten L7.
Nia deklara, rezolve restu mortais saudozu Sahe nian mak sei diriji karta ba Ministeriu Asuntu Kombatente Libertasaun Nasional no parte relevante seluk aloka orsamentu atu konstrui sede iha kada Postu Administrativu sira hodi akumula material funu nian no seluk tan, nuudar meius prezerva istoria funu nian husi tinan 1975 too 1999 sai istoria ba jerasaun foun sira.
Tanba nee husu veteranus sira atu nafatin kontribui ba prosesu dezenvolvimentu no labele sai opozisaun ba programa kada Governu no husu kontinua servisu hamutuk ho parte Polisia Nasional Timor Leste (PNTL) no FALINTIL-Forsa Defeza Timor Leste (F-FDTL) garante estabilidade iha Timor.
Kombatentes Lucio Freitas Salvador “Leki Loihare” hateten, iha esperansa ba Prezidente CMCLN Baukau neebe iha planu prioridade ba rezistensia sira iha Munisipiu Baukau.
“Ita haree husi katuas nia mini kampanhia nia fo valor liu ba rezistensia sira no la haluhan mos sira neebe mate ona no fatin sira neebe istoriku mos nia la haluhan ida nee, entaun hau espera katak nia sei halo buat ruma ba rezistensia Baukau oan,” katak Lucio.
Entretantu serimonia segundu konferensia loron daruak faze eleisaun ba estrutura foun CMCLN Baukau hetan partisipasaun husi kongresista nain 309 neebe realiza iha salaun Sentru Konvensoens Vila Antiga Baukau.
(tom)
