L7 Eleitu Prezidente CMCLN Baukau ba Mandatu Tinan 5

BAUKAU, STLTIMORLESTE.com – Segundu Komadante FALINTIL Rejiaun III, Cornelio Gama “L7” eleitu Prezidente Konselhu Munisipal Kombatentes Libertasaun Nasional (CMCLN – sigla português) Munisipiu Baukau ba mandatu tinan 5.

Prezidente meza segundu konferensia Cipriano de Castro “Mascot” hateten, konferensia loron dahuluk sira hili reprezentante Konselhu Munisipal Kombatentes Baukau iha Nasional neebe kompete husi kandidatura nain 3 mak hanesan Marito Reis, João Buka Tuir no Fernando neebe kandidatura mais votadu husi kongresista sira mak Marito Reis eleitu reprezentante Konselhu Munisipal Kombatentes Baukau iha Nasional.

Lorn daruak kontinua ba faze aprezenta kandidatura estrutura Konselhu Munisipal no konferesista sira hamosu pakote rua, pakote dahuluk kandidatura Fernando “Beredu’u” Gusmão kompleta ho nia estrutura Sekretariu nain 1 no membru nain 3. Nunee mos pakote daruak kandidatura Cornelio Gama “L7” kompleta ho nia estrutura kompostu Sekretariu nain 1 no membru nain 3.

Iha segundu konferensia nee hetan partisipasaun husi kogreresista nuudar veteranu dedikasaun eskluzivu husi 8a14 too 20a24 hamutuk nain 309 reprezentante kada postu nain 50, husi Postu Administrativu Laga, Baguia, Baukau Vila, Kelikai, Venilale inklui Postu Vemasi no nain 9 seluk husi estrutura Konselhu Munisipal Kombatentes Baukau. Durante prosesu lao husi kada kandidatura aprezenta nia planu prioridade ba mandatu tomak hafoin hakat ba faze votasaun.

“Konferensia nee L7 nia pakote mak liu iha Munisipiu Baukau ho votus 184 no ida ba Nasional nee 175,” hateten Mascot ba jornalista sira hafoin remata serimonia segundu konferensia iha salaun Sentru Konvensoens Vila Antiga Baukau, Tersa (12/08/2025).

Nia sublina, eleisaun ba estrutura Konselhu Munisipal Kombatentes Munisipiu Baukau kandidatura Cornelio Gama”L7″ nuudar Prezidente CMCLN, Sekretariu Roberto Carlos “Tarido”, ho nia membru nain 3 mak hanesan Marçal da Silva “Waikia”, Sidoneio Ximenes “Maunanis” no Agostinho Correia “Lafaek” ho votus 184.

Enkuantu pakote husi kandidatura Fernando “Beredu’u” Gusmão, Pedro P. de Oliveira “Nurak”, João Teodoso Ximenes “Samea”, Cipriano de Castro “Mascot” no Acacio Nicolao “Udang” hela ho votus 120.

Nia fundamenta, segundu konferensia hetan partisipasaun husi kongresista nain 309, maibe votus husi pakote rua sura hamutuk la atinji numeru konferesista, tanba kogresista nain 5 too tarde iha fatin konferensia.

“Demokrasia mak hanesan nee, iha diskusaun no debate, maibe ikus mai konferensia mak determina desizaun ita hotu halo tuir,” Mascot akresenta.

Prezidente meza segundu konferensia Konselhu Munisipal Kombatentes Baukau nee argumentu, prosesu konferensia loron rua, husi loron 11-12 Agostu nee demokrasia lao diak no hatudu rezultadu final ho Prezidente Konselhu Munisipal Kombatentes Baukau foun.

Entretantu istoria badak neebe STL asesu, Cornelio Gama “L7” moris iha tinan 1945, iha Suku Saelari, Postu Administrativu Laga, Munisipiu Baukau, sira maun alin hamutuk nain 6 feto 3 no mane 3.

“L7” nuudar Kombatentes Libertasaun Nasional neebe ho naran konhesidu “L Forae Boot” ga “L7”. Aleinde nee nia partisipa iha luta Libertasaun Nasional hafoin Timor ukun aan, nia involve mos iha vida politiku iha Partidu Undertim husi tinan 2005 too 2017. Aleinde mos nia involve iha Partidu PLP husi tinan 2017 too 2023 nuudar Deputadu iha Parlamentu Nasional.

“L7” mos nuudar membru Komite Sentral iha Partidu FRETILIN. Iha tempu kolonial Português “L7” nuudar tropa no sai Komadante FALINTIL iha area Baukau. Nia mos harii Organizasaun Sagrada Familia iha tinan 1989 no atual Prezidente CMCLN Baukau nee, iha tinan 2006 simu medalha ordem de guerilha no iha tinan 2018 kondekoradu ho medalha Ordem de Timor.

(tom)