DILI, STLTIMORLESTE.com – Tinan nee Ministeriu Edukasaun (ME) la fo konsesaun ba eskola privadu rua (2) hanesan Eskola Nobel da Paz no Rainha da Paz, tanba eskola rua nee daudaun sei iha problema nia laran.
Tuir Diretor Nasional Ensinu Sekundariu iha ME, Benjamin Gomes da Cruz Fernandes hatete, razaun ME la fo konsesaun ba eskola privadu rua neebe ohin mensiona, tanba agora daudaun eskola 2 nee sei iha problema nia laran entre fundador sira husi eskola rua refere.
“Ita nian eskola privadu sira nee kada estudantes hetan US$ 2, tanba kada fulan estudantes sira selu, maibe públiku la selu. Eskola privadu rua neebe la hetan konsesaun eskolar nee, tanba kazu nee sira lori ba iha tribunal. Nee duni ami labele fo lai antes desizaun tribunal sai, se lae too ikus se mak atu sai responsabilidade. Nee duni too agora eskola privadu rua nee la hetan konsesaun,” nia deklara.
Nia hatutan, karik rezolve los ona sira nian problema, tinan oin bele fo konsesaun nee ba sira, maibe agora sira la hetan osan ida nee, tanba bainhira rezolve los ona sira nian problema, nee bele fo ba sira.
Iha fatin seluk, Fundador Eskola Nobel da Paz, atual Diretor Eskola Sekundariu Nobel da Paz, Jeremias P. de Jesus hatete, kona-ba konsesaun eskolar too agora sira seidauk hetan, maske husi eskola halo ona pedidu ba Ministériu Edukasaun, maibe too ohin loron osan nee seidauk tama konta bankaria eskola nian.
“Maske ami nian eskola privadu, maibe povu nian oan barak mai eskola iha nee, tanba bainhira osan nee sai, laos atu fo ba fundador no profesores sira, maibe sei uza ba nesesidade eskola nian,” nia informa.
Jeremias hatutan, antes nee mos eskola Nobel la hetan konsesaun, agora tinan nee seidauk hetan osan ida nee, maibe ida nee kompetensia Ministeriu nian hodi bele fo apoiu subsidiu ba eskola privadu sira.
Ba asuntu nee too STL hatun notisia nee seidauk halo konfirmasaun ho parte Fundador husi Eskola Rainha da Paz.
(jac)
